admin
YiNtatheli kaMthunywa
IMVIMBI kuzwa yeqembu leHwange uFelex Chindungwe ubika ukuba bazayincitsha umphefumulo iHighlanders mhla bedibana layo eColliery kulimpelaviki kumdlalo weligi.
UChindungwe udibana leqembu asuka kulo kumasizini amabili adluleyo kumdlalo osuvele usemlonyeni yabathandi bebhola lenyawo edolobheni lamalahle.
Ekhuluma ngalumdlalo, umdlali lo uthe ngeke bayivumele ivukela phezulu kwabo iBosso.
“Sizavala sithi ngci. IHighlanders akumelanga isithathe kancane egumeni lethu.”
IBosso ingena umango isadalala idinga ukuthi inqobe. Lo kuzakuba ngumdlalo omkhulu kumqeqetshi uMandla Mpofu ngoba ukunqotshwa kwakhe kungaphendla indlela yokuthi axotshwe.
Lumqeqetshi usanda kuphiwa incwadi yokuthi aphange anqobe ngoba lapho iqembu elihlezi khona kulogu kuyethusa.
Ukuzethemba kukaChindungwe kuzajabulisa lomqeqetshi wakhe uNation Dube, ohlala esitsho ukuba malutshwane amaqembu azaphuma ethabile egumeni leColliery. Umqeqetshi weHwange lo usebuthanise iqembu elilabadlali abangaziwayo, inengi labo eliphuma kulelidolobho.
Ukholo alalo uDube yikuthi abadlali laba bafuna ukubonakala ngoba abakaze balugxobe enkundleni zePSL kukanti njalo ukudeleleka kwabo kubanikeza idlabuzane.
Ngokutshisa kwelanga edolobheni leHwange, kubanzima kumaqembu ukuthi athole imiklomelo ezwayo. Labadlali beHighlanders bazakubona okubonwa ngamanye amaqembu.
Ekhuluma lentatheli, uDube uthe uwulungiselele umdlalo wangempelaviki.
“Sizadlala umdlalo esiwaziyo. Lo ngumdlalo ofana layo yonke, ngendlela esilungiselele ngayo kuzafiwa,” nguDube lo.
IHwange iqalise kuhle isizini njalo kulesikhathi lapho eyakhokhela ilogu kodwa kuthe sekutshove imidlalo elitshumi, iyehlulekile ukugcina idlabuzane.
Online Reporter