admin
KWATHI ngesikhathi kufika omakhalekhukhwini, ngikhumbula omunye umngane wami wayefunga agomele ethi ngeke amthenga ngoba esebone imitshado yabantu itshabalala ngenxa kamakhalekhukhwini.
Ngangingamsoli laye mhlawumbe kwakuyindlela ayebona ngayo.
Kulento edukuda umoya wami ngendlela uzulu emhlabeni wonke jikelele asebenzisa ngayo umakhalekhukhwini, inengi labantu ufica nxa kungenzeka isehlakalo esithize abalindi imvumo bamane bathathe amapikitsha babhale okufika engqondweni zabo okunye kungamanga.
Ngikhumbula enye indoda yathi ibona umakhelwane wayo esilwa lekhosikazi lakhe kulokuthi abe ngumlamlankuzi, athi mayuyu kumbe malamu yena wayelokhe esibathele ezimele eceleni komduli ethatha amapikitsha unkosikazi womuntu ekhatshwa aze awele phansi.
Ukwazi ukulwa komuntu osuthi isibhuku seMadlodlo, wayekhahlela, wena osuke wabona idube likhahlela inkunzi yebhubesi ezama ukulijuma linatha amanzi.
Ungakwazi wawungathi yintathelizindaba ye-Aljazeera. Ngesikhathi esifitshane kwasokugcwele kuboFacebook, lakubo Twitter.
Ukuthi ake azihluphe ukuthi ikhosikazindini lilimele okungakanani akwaze kwamfikela engqondweni. Wakhohlwa ukuthi laye uzalwa ngumuntu ongumama, mina ngiyamenyanya umuntu ohlukuluza umuntu wesifazana, mhlawumbe yikuthi intombi ezala mina seyaya kwabhekabezayo, umuntu wonke ongumama ngimhlonipha njengoba ngangihlonipha uMaDawu weNkosi.
Kungaba kumbe kwenzakale ingozi ufica inengi labantu kulokuthi lisize bona baphitsheka ngokuthatha amapikitsha bathumele lapho abathanda khona.
Kwesinye isikhathi kwenzakala ingozi emigwaqweni kutshone abantu, bahle bagijimele ukukusakaza kubomakhalekhukhwini wabo lezihlobo zegazi zingakaziswa, amane nje umuntu ahlangane lakho kumininingwane.
Ngikhumbula enye indoda eyayivakatshele elizweni leZimbabwe ivela kweleMelika, yaphitsheka ngokuthatha amapikitsha umkayo ehudulwa yingwenya imdonsela emanzini kaZambezi.
Ye lingathatha amapikitsha kodwa qala uchwayisise ukuthi ngabe kambe okwenzayo ngeke kulimaze inhliziyo zabanye abantu, phela nxa uzakuthi uvula umakhalekhukhwini wakho uhlangane lepikitsha yomuntu osondelene laye kakhulu eseyisidumbu esenabe wathi thwitshi okwebululu elisuthi amagundwane ngesikhathi sehlobo.
Manini bantu beNkosi ukwenza umsebenzi elingawuholeliyo, zikhona intatheli yikho kulabahleli, yibo abatshoyo ukuthi lokhu kungafundwa nguzulu loba hatshi.
Asisebenziseni omakhalekhukhwini bethu ngendlela eziqondileyo Mthwakazi omuhle.
Ayixabene.
Umlobi ungamthinta ku: 0714355641
Online Reporter