admin
Thokozile Mbedzi
KULEMULI yesigabeni seKwangware eTriangle elahlekelwe lilunga lemuli yalo kulandela ukubulawa yindoda ebithandana lalo isola ukuthi kungani lale ukutshada layo.
Kubikwa indoda le, uVengesayi Makura ubulele uPauline Chiware oleminyaka engu-35 mhlaka 26 Mpalakazi ngoba eyale ukumtshada ethi umchithele isikhathi sakhe njalo wamehlukanisa lonkosikazi wakhe.
Kuzwakale ukuthi uMakura wayethethe wehlukana lonkosikazi wakhe kubangwa uChiware, abesethandana laye.
Ekhuluma lentatheli kaMthunywa uNkosazana Memory Sibanda uthe babone insindabaphenduli yendaba.
“Kwehle iyezi elimnyama lapha esigabeni sethu, ngikhuluma nje sonke sisamangele.
UVengesayi waqonda ngakibo kaPauline lapho afika wathi ufuna bakhulumisane ngoba yena usefuna ukumthatha kodwa uPauline wathi kakafuni ukwenda.
“Lokhu akuzange kumhambe kuhle uVengesayi ngoba wahle wamsusela amanqe ethi ngeke kwenzakale ngoba yena sowamdlalisela isikhathi sakhe lemali zakhe njalo waze wehlukana lonkosikazi wakhe.
“Ekhuluma konke lokhu uVengesayi wadobha imbodlela yomuthi wotshinda wawunkunkuluza eqeda lapho wamsukela waqala ukumtshaya ngogodo wabaleka wayangena emkulwini wavala, wamlandela wafika wakwatula isivalo wamtshaya ngogodo.”
Kubikwa uPauline wabaleka kodwa uVengesayi wamhlala izithende wamtshaya ikhanda ngogodo wawela phansi wamphinda esiphaqeni waze wafa.
Abantu besiyafika bafica uPauline evele esethule uVengesayi laye esejanquka eceleni waze wedlula laye.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yamapholisa.
“Udaba lwendoda ebulele inina ebifuna ukulithatha solufikile ehofisini yethu ngakho uzulu kangaxazululi inkinga ngodlame kababikele abanye bakhulumisane hatshi ukuthi kube lokulahleka kwemphefumulo mahlayana njengalokhu,” kuphetha uInsp Dewa.
Online Reporter