admin
YiNtatheli kaMthunywa
UHULUMENDE usesungule indlela uzulu angaletha ngazo izikhalazo alazo kungatsha zikaHulumende ezehlukeneyo.Uzulu uzenelisa ukutshayela ucingo kulawa mahofisi ngokungela mbadalo ukuze bethule izikhalazo eziphathelane lokungaqhutshwa kuhle komsebenzi lobugwelegwele kungatsha ezibona ngomphakathi (Public Service.)
Indlela yokwethula izikhalazo le, izasetshenziswa ndawonye lohlelo lokuthuthukisa ezomnotho olweZim-Asset lona olujonge ukuqinisa ingatsha zikaHulumende lendlela inhlanganiso eziqhuba ngayo umsebenzi kusetshenziswa indlela yokuhlola impumela zobukhokheli (Result Based Management).
UAmbassador Mary Mubi, ongumqondisi omkhulu ehofisini kaMongameli lekhabhinethi utshele intathelizindaba ngoLwesibili, eHarare ukuthi uHulumende uphakathi kohlelo lokuguqula indlela aqhuba ngayo inhlelo zakhe.
UAmbassador Mubi uthe ihofisi kaMongameli ikhankasela uHulumende oqhuba imisebenzi yakhe mgceke yikho nje sekusungulwe indlela ezinengi zokukhulumisana.
Lezi zibalisela inombolo zama-toll free engatsha zikaHulumende, ukutholisa incwadi zama-applications kaHulumende kanye lokwethula imibuzo lempendulo ebulenjini.
“Njengendlela yokukhuthaza ukuqhutshwa komsebenzi ngendlela, uhlangothi lweDepartment of Public Affairs and Knowledge Management ehofisini kaMongameli lekhabinethi lusebenzelana lengatsha zikaHulumende solusungule indlela yokwethula izikhalazo zikazulu,” kutsho uAmbassador Mubi.
Uqhubekele phambili wathi kuzasungulwa ama-client service charters. UHulumende uzaqhuba izifundo ukuze izikhalazo zikazulu zikhangelwe.
Uphethe ngokuthi kuzakuba lendlela yokunikeza njalo impumela ukuze kukhuthazwe ingqubela phambili.
Uthe lezindlela zokwethula impumela zizasekelwa ngama-ICT kanti ihofisi kaMongameli lekhabinethi izabe ifinyelela zonke izikhalazo ezethulwe ebulenjini.
“Indawo zokwethula imibiko ezigabeni zizadlala indima enkulu endaweni lapho okungela mitshina yalezinsuku, ama-ICTs,” nguMubi lowo.-Chronicle
Online Reporter