admin
Yintatheli kaMthunywa
IHLEKE umhlathi waze waqamuka indoda yeBezha eMawabeni kulandela ukuzwa ngendaba yendwangu okubikwa ukuthi yafika yaqoqoda komunye umuzi esiqintini lesi.Indoda le, uMnumzana Meluleki Ncube oleminyaka yokuzalwa engu-37 kubikwa yagijinyiselwa esibhedlela phakathi kwenyanga kaNhlolanja isisehluleka ukuvala umlomo ngenxa yokuhleka kakhulu.
Umfakazi owabona lokhu kusenzakala uNelisiwe Moyo uthe wayenatha loMnu Ncube kwenye ibhawa bezikwejisele kuze kwenzakale lesi simanga.
Uthe kulenye indlamanzi eyayibulala abantu ngembambo eyasuka yasixoxa ngodaba lolu oluyilo olwenza uMnu Ncube wacina eselimala umhlathi.
“Selokhu ngathwetshulwa yingwe angikaze ngibone umuntu ohleka aze aqamuke umhlathi. UNcube sasinatha laye utshwala sizixoxela nje samangala ngemva kokuhleka engasenelisi ukuvala umlomo esekhamise njengengwenya eyothamele ilanga,” kutsho uMnu Moyo.
“Sazama ngamandla onke ukuthi simhlanganise umhlathi wakhe kodwa wayesebubula engasenelisi ukukhuluma.
“Samgijimisela esibhedlela ukuze ayekwelatshwa. Thina sasesicabanga ukuba mhlawumbe uloyiwe ngoba singakaze sikubone okunje,” kulandisa uMnu Moyo.
Wengezelele wathi okwenza bacabangele ukuthi ngamaloyo yikuthi lokhe babayibo abakaze bazwe kuthiwa umuntu wephuke umhlathi ehleka ngaphandle kokuthi abe ehlelwe yingozi kumbe etshayiwe.
“Abantu bonke ababesebhawa basala bethithibele ngesiga sendoda le,” kuchaza uMnu Moyo.
Omunye umfakazi oseduze kakhulu loMnu Ncube ocele ukuba engalotshwa igama lakhe uveze ukuba kuliqiniso ukuba indoda le yaqamuka umhlathi ngesikhathi ihleka.
“Indoda le sasisonke ebhawa ntambama waselimala umhlathi ngesikhathi ehleka. Samgijimisela esibhedlela seSigodini ukuba ayekwelatshwa ngoba umlomo wawungasavaleki,” kuchaza lumfakazi.
Usobhuku wakuleyondawo uMnunzana Lifa Sibanda ubikele iphephandaba likazulu ukuthi wabizwa mhla uMnu Ncube esehlelwe yingozi le.
“UNcube samgijimisela esibhedlela sokukubi, engasenelisi ukuvala umlomo ngemva kokuhleka,” kutsho usobhuku uMnu Sibanda.
UMthunywa uxhumane loMnu Ncube ecingweni waveza ukuba kuliqiniso ukuba waqamuka umhlathi ngesikhathi ehleka.
“Ngalimala umhlathi ngesikhathi ngihleka. Esibhedlela bangitshela ukuba umhlathi awuqamukanga kodwa wawehlukene (dislocated) ngakho kwasokumele ubiselwe endaweni yawo.
“Angisaphindi ukuhleka kakhulu ngoba kuyingozi,” kutsho uMnu Ncube.
Online Reporter