admin
UNGAKHANGELA phose kumagumbi wonke womane omhlaba kukhalwa ngabantwana bakulezi insuku.
Abalayo inhlonipho njalo inengi labo bagijimela ukwazi lokwenza izinto ezingabalingananga. Ngezwa ubuhlungu ngifunda kwelinye iphephandaba kulodatshana lomntwana owayefunda ezingeni lemfundo yaphansi ekuviyo lesikhombisa, esezithwele njalo engazi ukuthi umthwalo wawungokabani ngoba wayehlanganisa abafana abanengi.
Phela bathi wayekhomba ngapha langapha ngitsho sibi sabafana benkomo, bathi babethambisa umphimbo kuye, wayengenelisi ukunyikinya ikhanda, wayenqekuza evuma yonke into ephathelene lezocansi, wayekhomba okomhlolo wawungathi kumbe ulezitho ezimbili, ethembe ukuthi kungadinwa lesi kusebenze lesiya, aluba wayeyimota ngabe kade wakhitshwa emgwaqweni ngenxa yobunengi bamatikiti.
Yikho mhlawumbe uthola abanengi bakhona besenda nzima njalo amajaha akhona inengi athatha nzima, bathatha amantombazana aseke alahla inkonyane, ukuthi athole intombi egcweleyo engakaze ichaphe uGwembe, sokwaba yilihlo lentwala, inengi lentombi zakhona zithi sezisenda sezingojolikazi ezisengwa zingela mchilo.
Amajaha akhona inengi lawo ukukhombisa abakwazi sebebadinga emisakazweni, kumaphephandaba lakungatsha ezitshiyeneyo zakubomakhalekhukhwini, bahlangane kwesinye isikhathi umuntu asebenzise umfanekiso ongasiwakhe bathi sebebonana mathupha kucine sokuphonguba yilokhu abathi ngolimi lwabondlebe zikhanyilanga yi-marriage of convenience. Kambe uyabe esezakuthini inkonyane isiwuchithile umuthi, yikho lemitshado yakhona ingayindawo, thina esikhule izolo intombazane yayitshitshelwa okwensuku layo ize ibone ukuzimisela komuntu, hatshi lokhu okungani ngumhlambi kaDlomo uyabula emahlangeni.
Njengomthetho inengi alisawugobeli loba umuntu wakhona ekhuluma lomuntu omdala, ufica angani ukhuluma losowabo, engagqize qhakala, lawe uhle uzibonele ukuthi zimuka lamanzi. Inengi labo isikolo abasela ndaba laso batshona begxumeke amakhanda kubomakhalekhukhwini bebona izithombe zabantu abanqunu, lokubukela amavidiyo angafanelanga, bakhohlwe ngezingwalo zesikoleni.
Isimanga nxa sebetshelwa ukuthi abafundanga bazonde bakhukhumale banuke okobulongo bechalaha obunethwe yimbolisamahlanga.
Ayixabene.
Umlobi ungamthinta ku 0714355641
Online Reporter