admin
Ethel Ncube
ABALIMI bakhuthazwa ukuba bavikele amatamatisi ekutshazweni ngumqando ukuze benelise ukuthola inzuzo.
Ekhuluma loMthunywa umlimisi weMatabeleland North uNkosazana Eliana Dube uveze ukuba isikhathi somqando sesifikile kungakho abalimi kumele bavikele izilimo zabo ekutshazweni.
“Abalimi abangenelisi i-green house kabazame ngazo zonke indlela ukuvikela amatamatisi abo ekutshazweni ngokuwathelela ntambama. Amatamatisi angatshazwa awavuthwa kuhle okucina kudala ukuba isivuno sibe phansi,” kutsho uNkszn Dube.
Uthe amatamatisi nxa engasavuthwanga kuhle umlimi ngeke wathola inzuzo ayikhangeleleyo.
Uqhubekele phambili eveza ukuba amatamatisi afuna ukunakekelwa kakhulu ngesikhathi somqando njalo yiso isikhathi esilemali nxa ethengiswa.
“Amatamatisi afuna ukunakekelwa kuhle ngalesisikhathi, okunye umlimi angakwenza yikweluka utshani enze okungamathikili kuthi lapho ahlanyele khona agombolozele ngamathikili la ukuze umtshazo ungafiki ematamatisini akhe.
“Isikhathi somqando yiso isikhathi abalimi abanengi abesaba ukuwalima ngaso amatamatisi kukanti wena ungazenzela amathikili akho uweluke ufake kugombolozele izihlahla zakho zamatamatisi umtshazo uyadlula eceleni ube usuzitshayela imali ngoba ayabe emalutshwana amatamatisi ngalesisikhathi,” kuphetha uNkszn Dube.
Online Reporter