admin
YiNtatheli kaMthunywa
KWEHLE iyezi elimnyama kumdlalo wenguqu kuleli ngombiko wokudlula emhlabeni kuka-Partson Ndabambi, owadla ubhedu enkundleni engumdlali waphinda waduma esengumqeqetshi.
UNdabambi wazakhela udumo lapho ethatha umsebenzi wokuqeqetsha iqembu le-AmaZulu. Ubungcitshi bakhe babonakala njalo ngokwenelisa ukulolonga abafana abasakhulayo lokuba ngumcuphi obona ithalenta elisacathula.
Inhlanganiso yePremier Soccer League (PSL) ikhiphe umbiko wenduduzo kumuli yakoNdabambi ibika ukuba inguqu ilahlekelwe liqhawe.
UNdabambi udlule emhlabeni ngoLwesibili eGokwe njalo ubekwe esiqintini seKwaTachi kulindawo. Umuyi, ngokubika kwemuli, ubengezwa kuhle emzimbeni kumalanga adluleyo.
“Ubengezwa kuhle, ubegula uPartson,” kutsho ilunga lomdeni.
“Sizwa ukudabuka kwenhliziyo ngokufa kukaPartson Ndabambi. Ubeyindoda ezimisele ukuthi isebenzele inguqu.
“Inkokheli zebhodi, ogavena lamaqembu ethula usizi kumuli yakoNdabambi, abangane lakumuli yenguqu jikelele kulandela ukufa kukaPartson Ndabambi.
“Ubelothando lomdlalo, ikakhulu ukuphakamisa abasakhulayo. Usebenze lamaqembu amanengi, eziphatha kuhle njalo. Sikhala ndawonye labakoNdabambi. Njengenhlanganiso sizamkhumbula siphinde siphakamise ibizo lakhe ngokuqhubekela phambili sikhankasela ithalenta labasakhulayo kunguqu,” kutsho iPSL.
UNdabambi uphinde wazakhela ibizo eseqeqetsha amaqembu afana leShooting Stars FC, ZPC Kariba lezinye ezikumaligi aphansi.
Umuyi uzakhunjulwa phose linengi labadlali abancedisa ukuthi baphumelele kumaqembu abo. Kuminyaka emithathu edluleyo umqeqetshi lo uqine ngokubukela lokucupha ithalenta kumincitiswano yezikolo lasemakolitshini.
Ubonakale kakhulu kumqhudelwano ebalisa iCopa Coca-Cola laleyo esekelwa yinhlanganiso yezikolo eyeNational Association of Secondary Heads (Nash).
Kusenjalo lenhlanganiso ebona ngempilakahle yabadlali eyeFootballers Union of Zimbabwe (FUZ) yethule umbiko ngokuzwa ubuhlungu ngokwedlula kukaPartson Ndabambi.
Online Reporter