Online Reporter
Brandon Moyo
IQEMBU lekhilikithi eleSri Lanka lizavakatshela kuleli ekupheleni kukaNcwabakazi ukuzophatheka kumidlalo emihlanu.
Kodwa, ilizwe leli kalisoke libuye lo-leg spinner walo ohluphayo uWanindu Hasaranga, okubikwa wephuka umsipha enyaweni.
Kubikwa umdlali lo walimala ngesikhathi bedlala ama-ODI lelizwe leBangladesh ngoNtulikazi, wacina esehluleka lokudlala lamaT20I.
Ngokutsho kwembiko ephuma kuSri Lanka, umdlali lo oleminyaka engu-28 yokuzalwa, usathola usizo kwabezempilakahle.
Loba kunjalo, uPavan Rathnayake loNuwanidu Fernando bakhethwe eqenjini kunye loDilshan Madushanka, Maheesh Theekshana, Charith Asilanka, Kamindu Mendis, Kusal Mendis, lo-Asitha Fernando.
Iqembu leli likhangelelwe ukuthi likhokhelwe ngu-Asalanka.
Amazwe womabili, iZimbabwe leSri Lanka azadlala imidlalo emibili yama-One Day International (ODI) lama-T20 amathathu, eHarare Sports Club, mhlaka 29 Ncwabakazi.
AmaChevrons asanda kuphuma emdlalweni leNew Zealand lapho anqotshwe khona yiSouth Africa leNew Zealand eQueens Sports Club koBulawayo.
Umdlalo leSri Lanka uzabe ungowesibili owama-50 overs lonyaka, owakuqala abafana bakuleli babedlala le-Ireland ngoNhlolanja lapho abanqoba khona 2-1.
IZimbabwe leSri Lanka zacina ukudlala zonke ngoZibandlela ka2024 eColombo. Kwanqoba iSri Lanka nge 2-0.
Amaqembu la, asedlale amahlandla angu-63 awama-ODI, lapho amaChevrons anqoba imidlalo engu-12, phakathi kwayo emithathu isekhaya.
ISri Lanka yanqoba engu-49, phakathi kwayo engu-20 isemangweni.
