Online Reporter
Fungai Muderere
IQEMBU elikuligi yeCastle Lager Premier Soccer League (PSL) iChicken Inn selithumele amazwi enduduzo kulandela ukwedlula emhlabeni komdlali uTendai “Fire” Ndoro.
Ngokutsho kwemuli, uNdoro, okhulele eNketa koBulawayo, ufele eSouth Africa ngoMvulo kusihlwa ngemva kokhathazwa ngumkhuhlane wetshukela okwesikhathi eside.
“UNdoro waba ngumdlali wethu wakuqala ukumthengisa ngaphandle kwelizwe. Samthola ephuma kuNico United eBotswana. Wafika wafaka umlilo eqenjini lethu. Uzahlala eli-Gamecock. Siphatheke kabi ngokudlula kwakhe emhlabeni njengeChicken Inn FC. Liqhawe lethu. Lala ngokuthula Fire,” kutsho isikhulumi seChicken Inn uNkululeko Nkala.
Ukudlula emhlabeni kukaNdoro kutshiye inengi labathandi bebhola kuleli laseMzansi bekhathazekile.
Amalungiselelo omngcwabo wakhe azavezwa ngokuhamba kwesikhathi.
