admin
Wayne Ncube
NGEMVA kokwehluleka ukunqoba iBotswana kumdlalo wakuqala womqhudelwano wenkezo ye-Afcon yomnyaka ka-2021, amaWarriors abuyisele ithemba ngokutshaya iZambia 2-1 egumeni layo.
Amabhola womabili ahlohlwe ngu-Khama Billiat.
Kube yimpumela enhle kubalandeli bamaWarriors abakade sebekhonona ngendlela umqeqetshi uJoey Antipas aqeqetsha ngayo, besithi kungangcono akhitshwe emsebenzini kudingwe umqeqetshi ongcono.
Abasekeli lababukeli bomdlalo owawuseNational Sports Stadium ngoLwesihlanu batshengisela phambili kuka-Antipas behlabela ingoma zokuthi kumele ahambe.
Abantu laba, abaletha ihlazo kulumqeqetshi baphenduke izithutha nanko amaWarriors anqobe okungelansolo phezulu kweChipolopolo.
Ukudla iZambia kutsho ukuba amaWarriors asekunombolo yesibili kungalane elezizwe ezibalisa iAlgeria, iBotswana leZambia. Intshantshu ze-Africa iAlgeria ziyakhokhela kulandela ukunqoba imidlalo yayo emibili.
Baqinisile nxa bethi inguqu ngumdlalo, ibhola lingagiqikela kuloba liphi icele, abalandeli beqembu lesizwe bazwa ubuhlungu ngethemba labo elihambe mahala iqembu lingasanqobanga.
Umsekeli kamgcinisihlalo wabasekeli bama-Warriors kunhlanganiso yeZimbabwe National Soccer Supporters Association (ZNSSA) uCarlmax Nkomo uthe usekelo kuma-Warriors aluqhubeke ngoba iqembu lizanqoba.
“Kuhle ukuthi sinqobile phezulu kweZambia. Njengabasekeli kumele sisekele lalapho iqembu lesizwe lingenzi kuhle ngoba ithimu ngeyethu. Sizaqhubekela phambili sibalandela abafana kumkhankaso wabo,” kutsho uNkomo.
Iphephandaba likazulu likhulumisane njalo labanye abalandeli abaveze ukuthi abazange bazwisise ukuthi kungani uAntipas wehluleka ukunqoba kuBotswana
“Sasikhangelele ukunqoba iBotswana yikho samangala ukuthi kuyini okwehlula uAntipas.
“Udliwa njani uloNakamba loBilliat eqenjini elilodwa? Sithi ukubuya kwabo bevela emazweni bazasenzela into engcono enkundleni kanti vele sifake ithemba kubabhemi ofileyo. Abadlali esilabo bazintshantshu ngakho indlela abadlala ngayo ibhola emazweni siyakufisa ukukubona bekwenza laseqenjini lelizwe,” kulandise uMclean Mhlanga.
UBhekinkosi Tshabalala ubike ukuthi indlela abadlala ngayo ingcono kulokuthi badliwe.
“Kungcono ukuthi sifanane labeBotswana kulokuthi basinqobe, ithemba lethu lomdlalo lowana wawuphakeme kakhulu ukuthi labadlali basindwa amahlombe ngomdlalo ababekhangelelwe ukuthi bawukhuphe enkundleni.
“Singabalandeli bamaqembu sihlala sifisa okuhle ngamaqembu ethu kodwa lathi kwezinye izikhathi kumele sivumele ukuphoxeka,” kuphetha Tshabalala.
Online Reporter