adminCornelius Luphahla
ILOKHU ingundabamlonyeni insindabaphenduli yendaba eyenzakale esiqintini seDekha esigabeni seLake Alice ngemva kokuba esinye isakhamuzi sakule indawo simithise umalukazana womnewabo qede umntanaso wasihlawulisa inkomo ezintathu.
Linkemenkeme yenzakale kuviki ephelileyo lapho kuvela ukuthi uJorum Majelani Ncube wamithisa uSimeleni Moyo umkaMlamuli Ncube okudale ukuthi uMlamuli amhlawulise inkomo ezintathu.
Intatheli ixhumane loNkosazana Sisasenkosi Maseko oyisakhamuzi sakule indawo wachaza ukuthi indaba le iyabethusa kakhulu.
“Indaba yenzakele sibili esigabeni njalo kuyasimangalisa kakhulu ukuthi umalukazana angaze athandane loyisezala. Isimanga yikuthi umalukazana lo ubehlala loyisezala loninazala umkakhe esebenza eLupane okutsho ukuthi uyisezala omncane lo ubebuya ebusuku azongena emzini womfowabo,” kutsho uNkszn Maseko.
Ekhuluma lentatheli uMnumzana Silas Mathe uchaze ukuthi yena wakubona kudala ukuba uNcube uhlanyisana lomalukazana wakhe.
“Mina ngakubona kudala ukuthi uNcube uhlanyisana lomalukazana wakhe ngoba babethi nxa besiya ezitolo zeSt Lukes baqhubane ubathole besidla ndawonye ezitolo. Lokhu kwakuhle kuveze ukuthi kukhona okukhona kulaba ngoba kuyazila ukudla lomalukazana mganu munye.
“Kwesinye isikhathi uNcube wayebonakala ekuseni ephuma emzini womfowabo asazi ukuthi kungani umfowabo wayengamboni njengoba wayeziphumela ilanga seliphumile. Okunye njalo okumangalisayo yikuthi umkakhe wayengamangali ebona umkakhe engekho ngesikhathi evuka ekuseni,” kutsho uMnu Mathe.
Ebuzwa ngale indaba uMlamuli uvumile ukuthi ngempela wehlelwa ngamashwa okumithiselwa umkakhe ngubabomncane wakhe waveza ukuthi sebehlukana lomkakhe.
“Kuliqiniso sibili ukuthi umuntu ebengimthethe umithiswe ngubabomncane wami ngambhadalisa inkomo ezintathu. Inkomo yakuqala ibe ngeyokuthenga umbheda ngoba ababelala kiwo ngihle ngabapha. Eyesibili ibe ngeyokufohla umuzi wami kwathi eyesithathu yaba ngeyokuthi ngenelise lami ukuyakhiphela omunye umfazi njengoba lo esethethwe ngubabomnancane,” kutsho uMnu Ncube.
Ebuzwa ngale indaba uJorum Ncube kachithanga isikhathi ngokulandula indaba le, umane wavuma ukuthi kuliqiniso ukuthi wamithisa umalukazana wakhe wengezelela ngokuthi ufuna ukumthatha.
“Kuliqiniso sibili ukuthi ngona umalukazana njalo umntanami ungihlawulise inkomo ezintathu ngakho umfazi ngimthethe ukimi,” kutsho uMnu Ncube.
Usobhuku wakule indawo uMnumzana Ackim Nyoni uveze ukuthi indaba le yathoniswa kuye.
“Indaba le ngiyayazi yathoniswa kimi njalo uSilas Ncube nguye owazibizela isigwebo asifunayo kuyise inkundla kayizange ikhulume lutho. Ngikhuluma nje lenkomo zakhona sezaphuma zisesibayeni sakhe,” kuphetha uMnu Mathe.
Online Reporter