admin
Thokozile Mbedzi/Nomathemba Moyo
KULESELA lelokitshini leMinyela elibotshwe ngamapholisa akoBulawayo ngoLwesibili emini kulandela ukutshontsha ama-solar panels lama-batteries ayisificaminwe mibili okubiza iUS$14 000.
Umetheswacala uZenzo Benoni Moyo oleminyaka engu-36 ohlala eMinyela utshontshe impahla lezi eFumugwe Clinic eMatobo kunye leStanmore Clinic esigabeni seStanmore.
Ebikela intatheli ngoLwesithathu ekuseni enkambeni yamapholisa yeCentral Police, isikhulumi samapholisa akoBulawayo uInspector Abedinico Ncube uthe babophe indoda yeMinyela koBulawayo ebotshwe ithengisa ama-batteries atshontshiweyo endaweni ezimbili ezitshiyeneyo.
“Sibophe uZenzo Binon Moyo ohlala elokitshini leMinyela koBulawayo obebuye lama-solar lama-battery abiza US$14 000 awatshontshe eFumugwe Clinic eMatobo leStanmore Clinic.
“Ekufikeni kwakhe lapha uhle waqala ukuwathengisa ebantwini lapha koBulawayo kodwa bakhona abalume amapholisa indlebe.
“Lakanye amapholisa aphuthuma afika lawo enza njengabantu abafuna ukuthenga wawathengisela bahle bambopha,” kuchasisa uInsp Ncube.
Uqhubekele phambili esithi kulabanye njalo abathathu abaphatheke ekutshontshweni kwempahla le.
Uthe impahla le isibonakele kwabuzwa inkampani eyawafakayo yachaza ukuthi ngempela yiyo eyayifakayo. “Thina njengamapholisa sicebisa uzulu ukuthi iBulawayo kayisiyo ndawo yokufikela izinto ezitshontshiweyo njalo abantu bakoBulawayo bayacetshiswa ukuba bengathengi impahla emikotweni engela macence kumbe ezingela ma-receipts.
“Kungenzakala lokhu kabazise amapholisa ngoba labo bengatholakala belempahla lezo bayabotshwa,” kuphetha uInsp uNcube.
Online Reporter