admin
Wayne Ncube
IZAKHAMIZI zelokitshini leBirthday eZvishavane sezithwele amagabha avuzayo ngenxa yendwangu esezisidla ubhedu kule indawo nanko phela kubikwa sezihluthuna abantwana besemhlane yabonina.
Indwangu lezi ebezivame ukujwamula ukudla kanye lokungena ezindlini ngamawindi zitshontsha ukudla khathesi sezitshintshe igiya ngoba sezithatha labantwana.
Kubikwa kulabantwana ababili abahanjiswe esibhedlela belimele ngemva kokuhluthunwa zindwangu .
Izakhamizi zelokitshi leli zibikele intatheli ukuthi sokukabili indwangu zigijinyiswa sezithethe abantwana.
“Asazi sibili ukuthi indwangu lezi sezilamba okokuthi sezifuna ukudla ngitsho labantwana. Khathesi indwangu lezi sezisesabisa ngoba besesijwayele ukuba zitshontsha ukudla lenkukhu, kodwa khathesi sesisesaba ngitsho lokutshiya abantwana bedlala phandle, asazi ukuba yindlala kumbe kuyini?
“Emalangeni ngibulawelwe impahla zindwangu lezi sezingene endlini,” kulandisa elinye inina elithande ukwaziwa ngokuthi nguMaSibanda nje kuphela.
UMthunywa ukhulume labantwana bekolitshini leMidlands State University abaveze ukuba ilokitshi leBirthday seliyingozi ngoba indwangu sezixhwalile.
“Indwangu ezihlala duze leBirthday sezixhwalile sibili, ngike ngaluzwa udletshana lokuthi sezihluthuna abantwana bebhajulwe ngonina.
“Thina lathi njengabafundi sesaze sabaleka kulelilokitshi ngoba ebusuku ziyagijimisa abantu kuthi nxa uphethe ukudla ziyakuthatha lakho,” kutsho uSindisiwe Ncube ongumfundi.
Isikhulumi seZimbabwe Parks and Wildlife Management Authority (Zimparks) uMnumzana Tinashe Farawo uthe kayisikho ukuthi indwangu lezi sezidlule kodwa nje zilokudelela abesifazane.
“Indwangu zihlakaniphile kakhulu, ziyananzelela masinya ukuthi lo ngumuntu wesilisa loba owesifazana kungakho zandise ukudelela abesifazana. Lokhu kuvamile endaweni zonke nje lapho okuhlupha khona indwangu. Omama okumele bakwenze nje kuphela yikuthi kumele babe lesibindi bamelane lazo ukuze zingabadeleli,” kuphetha uMnu Farawo.
Online Reporter