admin
Wayne Ncube
IZISEBENZI kanye lezigulane zesibhedlela sePumula Mision eTsholotsho sezikhalaze ngokuvela njalonje kwenkalakatha zenyoka kumawadi osokusenza abantu bahlale besevalweni.
Lokhu kuza ngemva kokuba kumaviki amabili edluleyo kubonakale inyoka eluhlaza engabande okwamamitha amabili emakamelweni abomama okubeletha phakathi kobusuku.
Abantu bathe bebona uhalabezi lolu babaleka basisitheka nanko phela inyoka le ibisedlula amamitha amabili ubude.
Isikhulumi sesibhedlela sePumula Mission uMnumzana Albert Moyo uthe kwatholakala inyoka emakamelweni okubeletha. Uthe inyoka le yabonwa ngomongikazi ababesebenza ebusuku ngehola lesitshiyagalombili.
“Inyoka eyabonakala esibhedlela yayinkulu okwamamitha amabili kodwa senelisa ukuyibulala. Le akusinyoka yakuqala ukubonakala lapha esibhedlela, sihlala sizibona sizibulala njalonje.
“Inyoka ezibonakala lapha zonke zinkulu njalo sokusenza izigulane zingahlaliseki,” kulandisa uMnu Moyo.
UMnu Moyo ukhalaze ngokuthi isibhedlela kasila zibane zokukhanyisa ebusuku, kodwa wasebonga omongikazi abaphangisa ukubona inyoka le ingakalumi muntu.
“Isibhedlela sisebenzisa izibane ze-solar, okwakhathesi ziyaphangisa ukucitsha ngoba kuhlala kulezulu njalo lama-battery kawasagcini mlilo kakhulu,” kuchaza uMnu Moyo.
Online Reporter