admin
YiNtatheli kaMthunywa
ABADLALI bakoBulawayo abaphuma ezikolo zemalokitshini sebetshengisele ukuthi bazingcitshi kuthenisi ngokunqoba imidlalo yaphezulu kumncintiswano wamazwe owe-International Tennis Federation Under 14 oqhutshelwa kulelidolobho.
Bekulabantwana abahlanu abavela emalokitshi abakuma-under-10 kuphela. UBoitumelo Ncube (9) ubeyitshantshu phakathi kwamankazana wonke abeqala ukudlala kumncintiswano wethenisi ngemiklomelo engamatshumi ayisitshiyagalombili, kukanti uMkhululi Ncube ubeyingcitshi kuqula labafana ngemiklomelo engu-44. Abanye abatshengisele ukuthi balekusasa enhle bedlala ithenisi kulumncintiswano nguAshley Mkwebu loMarvellous Ngwenya abathathe inombolo yesibili leyesithathu.
Umqeqetshi wabo uNqobile Sithole obethabe emanzi ngokuphumelela kwethimu yakhe, uthe ubethwele amagabha avuzayo ekutholeni imali yokuhambisa abantwana kulumncintiswano.
“Ngilabantwana abangu-160 engibafundisayo kodwa bengifuna ukuletha abantwana abanengi abakade betshengisa ithalenta kuthenisi kodwa ngaswela imali. Ngenelise ukuletha abantwana abahlanu kuphela.”
Imali ebifuneka ibingeyokudla, eyokuhamba kanye leyokungena kulumcintiswano. Uqhubeke wathi loba inengi labantwana liledlabuzane lokudlala ithenisi, kuswelakala abaqeqetshi abalolwazi olujulileyo ezikolo ezinengi.
“Abantwana bayithakazelela ithenisi. Uhlupho yikuthi lumdlalo ngumdlalo ofuna imali enengi njalo balutshwabne abaqeqetshi abazi ukufundisa umdlalo lo ngokupheleleyo ezikolo.
“Okwakhathesi sibalutshwane abaqeqetshi bethenisi emalokitshini ngoba abanye bakhetha ukufundisa emasebhabha lapho okubiza imali enengi.”
Kusenjalo inhlanganiso yeTennis Zimbabwe isiphezulu kwamalungiselelo okuthumela abadlali abazamela isizwe kumncintiswano weFed Cup.
Ebikela uMthunywa esesigodlweni, uRegis Bhunu umphathi weTennis Zimbabwe uthe “Siphakathi kwamalungiselelo wokudinga imali yokuthi senelise ukuthumela ithimu kunkezo yeFed Cup lonyaka.
Sesinanzelele ukuthi sekulabadlali besifazane abanengi abathakazelela umdlalo abaseMelika. Sifuna ukubahlolisisa abadlali laba ukuze bangene kuqembu lesizwe.”
Uthe abadlali abaphetsheya sebelungele ukuncintisa kuthenisi yaphezulu ngoba sebaqeqetsha badlala lumdlalo emakolitshini lamayunivesithi.
Kufinyelele endlebeni zikaMthunywa ukuthi ngo2011inhlanganiso yeInternational Tennis Federation yabhadalisa iTZ i$1 500 njengesijeziso sokungathumeli ithimu kuFed Cup.
UBhunu uthe loba sebedidizela ngeFed Cup, inhlanganiso yakhe isibuyeliswa muva ngabadlali bakuleli abaphetsheya abangafuni ukumela isizwe.
IZimbabwe ike yabalethimu eqinileyo isancintisa kulinkezo.Ithimu le yalidlalelwa nguFadzayi Masiyazi oseqeqetsha eSouthern Illinois University, uVimbayi Mawisire, uTanya Gombera loKerry Lang.
Online Reporter