Zviri Mugapu 

MASAMUSA kudya kwakanaka zvikuru uko kunofarirwa nevanhu vakawanda, kunyanya avo vanenge vari parwendo sezvo achigara nguva refu asati ashisha.

Kune mhando dzemasamusa dzakasiyana dzinogona kubhekwa munhu achiisa humwe hudobi-dobi hwakaita senyama, minzi, mbatatisi kana makerotsi.

Svondo rino Nhamoinesu Janhi wekuChitungwiza anorondedzera pamusoro peimwe nzira yekubheka masamusa.

Zvinodiwa:

Furawa, munyu, mafuta, hanyanisi, muto wemaremani (lemon juice) nemasipaisi (spices)

Mabhekero:

Kanya furawa woisa munyu nemuto wemaremani.

Isa mvura shomanana mukukanya kuitira kuti furawa isare yakakora ichiumbika.

Chikanga hanyanisi dzitsvukire wosanganisa nembatatisi dzaunenge wabika parutivi kana nyama.

Umba furawa uchiita zvimabhora.

Chipwanya zvibhora izvozvo neruwoko rwakachena uye rwakazorwa mafuta uchipeta sezvaunoda pamwe nekuisa minzi, pizi makerotsi kana mbatatisi pakati.

Wozodii?

Isa mafuta mupani wosiya kuti apise.

Chikanda masamusa woasiya kwemaminitsi gumi.

Ita izvi nemoto wakaderera kuti aibve pamwe nezviri mukati.

Kana atsvukira, pindura kuti mativi ose aibve.

Chibura unyautse mukanwa!

Masamusa anogona kudyiwa uchinwa nesvutugadzike, zvimwe zvinwiwa kana kuti uchinyika mumuto.