Online Reporter
Nkosilathi Sibanda
NGOLWESIHLANU abathandi lababukeli bomdlalo kanobhutshuzwayo koBulawayo bazakuthi gwaqa enkundleni yeWhite City, belande umdlalo ozabe uphakathi kweHighlanders leChicken Inn, kunkezo kaZibuse.
Amaqembu la yiwo wodwa adlala kuligi yeCastle Lager kumhlubulo ongezansi yelizwe, njalo ngemva komdlalo kuzabonakala ukuthi yiliphi iqembu elibusa elinye koBulawayo.
IHighlanders ijwayele ukudlala kunkezo kaZibuse njalo yake yanqoba, itshaya iqembu leDynamos, ngesikhathi zombili lezi kuyizo zodwa ezazidlalela inkezo le.
KoBulawayo, ngomnyaka odluleyo, iChicken Inn yadlala leBulawayo Chiefs yadliwa.
Kusenjalo, emcimbini kaZibuse omkhulu, ozaqhutshelwa esiqintini seNembudziya, eGokwe North eNkabazwe yelizwe, kuzadlala iSimba Bhora leFC Platinum kulindawo.
Umdlalo wenkezo kaZibuse udlalwa okwakuqala eNkabazwe, lokhe ilizwe lathola inkululeko.
Lokhu kwenziwe kulandelwa isinqumo sikaHulumende sokutshintshwa kwendawo lapho okuqhutshwa khona umkhosi kaZibuse minyaka yonke.
UHulumende uthi kumele zonke izabelo zelizwe ziphathe umcimbi lo.
