Online Reporter
YiNtatheli kaMthunywa
Kulendoda eleminyaka engu-22 yokuzalwa yakuleli, okubikwa iqume umphimbo wosane oluleminyaka emibili eGoli, ngenxa yengxabano ebangelwe yisikwelede seR20.
Isehlakalo lesi senzakale mhlaka 8 Mabasa.
Kubikwa unina wosane lolu olungumfana wayelesikwelede sikametheswacala njalo kwasekulesikhathi eside engasibhadali.
Kusenjalo, labo abaseduze lemuli le bayalandula ukuthi isikwelede seR20 yiso esibangele ukusikwa komphimbo wosane. Usane lolu, uSiyanda Ndlovu (Gwabavu) lubekwe eSouth Africa ngeSonto.
Uyise wosane uthe lokhe belinde ukubikelwa lipholisa elichwayisisa ngodaba lolu.
“Ngike ngazama ukukhulumisana lepholisa elichwayisisa ngodaba lolu lathi lizabuye lingithinte.”
Isihlobo esiseduze, uMoreboys Munetsi, besilokhu siphathekile ukuthi umngcwabo uqhubeke kuhle loba bekulokungazwisisani.
UMunetsi uqinisekise ngesehlakalo lesi wabuye wathi ingalo yomthetho kumele isebenze.
“Usane lubulewe yisizalwane seZimbabwe njalo lungcwatshwe ngeSonto.
“Umphimbo wosane ubuqunywe kwasala kubambe kancane, singathi isilinganiso se-70 phesenti besiqunyiwe, umetheswacala uthe wenze lokhu ngoba unina wosane esala leR20 yakhe.
“Owambulalayo uleminyaka engu-22 njalo uthi wambulala ngoba umama womntwana ubelesikwelede kodwa unina wosane uyakulandula lokhu,” utsho njalo.
UMunetsi onguMqondisi weGreathope Funeral Services uthe bakhetha ukuncedisa esililweni kungelambadalo.
“Kubuhlungu ukungcwaba usane oluleminyaka emibili. Usane lolu belungenelisi ukuzivikela kundoda le eyayisibanjwe ngumoya wokuquma umphimbo walo ngengqamu.
“Engikucelayo yikuthi asikhulekeleni umama lo olahlekelwe ngumntwana ngoba kunzima ukuthi akwamukele.”
“Akakho ofuna ukungcwaba umntanakhe oleminyaka emibili. Imuli le idinga njalo ukucebiswa ngokwengqondo ngapha kudingwa indlela zokuthi umthetho udlale indima yawo,” kwengeza uMunetsi.
“Kulokho esikunanzelelayo, umetheswacala kungathi uqamba amanga. Ulamanga ukuthi wabulala usane ngenxa yesikwelede esathathwa ngunina wosane.
“Kunengi okungacaciyo ngoba akula mifanekiso eyathathwayo lapho okwenzakala khona isehlakalo lesi.
“Umthetho kumele ulandelwe kodwa sizaqhubeka sitshumayela ngokuthula lothando.”
