adminKULE inkondlo imbongi ikhuluma ngowesifazana osekhala ngokungahlalisani kuhle lomyeni wakhe Kanye labakwabozala. Okumqoka yikuthi umama lo uthi wayehlezi kuhle kwabo engasweli lutho, esutha esidla konke okuhle ayekufuna okunjengenye nyama njengoba ethi inyama wayeyipheka ngomhluzi wenye okutsho ukuthi kwakuhlala kuhlatshiwe kwabo. Kwakufuyiwe kwabo lekusindeni wayehlinza ngobethole.
Okokuthi wayesutha kwabo kufakazwa yisitsho lesi esithi, “Ngilala ngesibomvu kwethu”, kukanti inhlalakahle uyiveza ngesitsho njalo esithi, “Ngikhomba ngophakathi kwethu”. Ngesaga esithi, “Umangoye engalali eziko kwethu,” umama lo utsho ukuthi kwakungalanjwa kwabo. Kodwa kukhanya umyeni wakhe wamtshiyisa bonke lobu buhle esemuphe ezithembiso ezinhle njalo ezinkulu ngoba uthi wayethenjiswe izulu lomhlaba.
Umyeni wamtshiyisa konke lokho wathi aze kuye ngoba engumphefumulo wakhe etsho ukuba uyamthanda kakhulu angezake aphile engelaye ngoba umuntu uphila ngomphefumulo. Esezwe elomyeni wakhe umama lo uthi wadela zonke izihlobo zakhe, wabafulathela abazali bakhe. Watshiya bonke abangane bakhe ngoba esithi usewelwe yinhlanhla. Kanti ngokucabanga njalo wayengabuzanga elangeni. Wayesezilethele udubo ayengelalo. Lokhu kugcizelelwa yisaga esithi:
“Kant’ngizokhel’ amalahl’ ekhanda.” Lamhla usengokhala ezimathonsi lumama ngoba usehlukuluzwe ngumyeni wakhe ambiza ethi, “Mntakwethu.” Uyavuma lumama ukuthi usexabanise umyeni wakhe lezihlobo zakhe nanku phela uthi usebehlukanisile. Umyeni wakhe kasezwani lezihlobo zakhe ethi sebengumangoye lenja khona okungabonani ngalihlo. Nxa kuthe kwabanjalo kuba lokulwa okukhulu. Ngakho-ke umyeni wakhe usexabane lezihlobo akusela kuzwisisana.
Umama lo kukhanya sebemethesa icala lokuthi usethakatha uyisezala loninazala kanti bekungenjalo ekuqaleni.
Usengobase ichithamuzi kwabo kamyeni wakhe ngoba nanku abantu kabasezwani sekuchitheka umuzi. Abantu balenkolelo yokuthi ichithamuzi lingabaswa ekhaya umuzi uyachitheka.Umama lo usesetheswa amacala amanengi angelakwenza lawo. Nanku lapha kuthiwa usexotshise udadewabo womyeni wakhe ekwendeni ngokumfundisa ukunyeya.
Esikunanzelela lapha yikuthi bonke ububi osebukhona lapha ebukhweni bakhe buvezwa nguye umama lo. Kukhanya bekungelandlala kulumuzi kodwa isikhona ngenxa yakhe. Usebenzisa isaga esithi, “Umangoye selaliswe yimi eziko kwenu.” Usecalwa ngokuletha indlala lapha ekhaya lumama. Abakwabozala lomyeni wakhe kabasezwani labomakhelwane. Indlela ekade ikhona behambelana isimile utshani ngoba omakhelwane sebewuceza, bewukheleza bengasangeni kuwo umuzi lo ngenxa yalumama.
Uyacalwa lumama bethi ulenkulumo eziphihlika ukubola ngakho lokho sebeseyiswa abakwabozala, abaseyibo bantu balutho ngenxa yakhe. Ngenye indlela kabasela zithunzi ngoba bethi lumama usebafunze ububi. Phetha izigaba eziseleyo mfundi uzwe isiphetho sayo linkondlo.
Online Reporter