Online Reporter
Fungai Muderere
UKELVIN Kaindu uthe kazange azinakane eqeqetsha iDynamos njalo indlela ehlukana ngayo leHighlanders yiyo eyamfuqa ukuthi athathe umsebenzi kumaGlamour Boys.
“Ngicabanga ukuthi umbango okhona phakathi kwamaqembu womabili (iHighlanders leDynamos) wenza kubenzima ukuthi umdlali kumbe umqeqetshi asuke kuHighlanders aye kuDynamos,” kutsho uKaindu.
“Angizange ngizicabange ngiqeqetsha iDynamos kodwa lokhu kwenziwa lula layindlela engasuka ngayo kuHighlanders.”
UKaindu ubengumqali wesiziba, ngokuba ngumqeqetshi wakuqala ukukhuza amaqembu amakhulu la ngesizini eyodwa.
Kusigaba sakuqala sesizini, uKaindu eqeqetsha iBosso, umdlalo leDynamos waphela kuyi 0-0 enkundleni yeRufaro mhlaka 1 Nhlangula. NgeSonto edluleyo umdlalo waphela ngokulingana nge 1-1.
Ngaphansi kwalumqeqetshi, iDeMbare isizame ukubalekela ukuqunywa lizembe kungalane yamaqembu kuCastle Lager Premiership.
“Konke kuvele ekuthini sizimisele kakhulu nxa silolonga. Akukho lula. Kodwa ke, lokhe siphansi kwelogu. Ngiyajabula ukuthi kade sithola imiklomelo lokuthi sesibambe amaqembu amanengi,” kutsho uKaindu.
IDynamos ihlezi kunombolo yesi-15, ithwele imiklomelo engu-34, ilingana leTriangle, Greenfuel leManica Diamonds, lazo ezizama ukubalekela izembe.
Kusenjalo, iCAPS United yenelise ukunqoba iManica Diamonds nge 1-0. IBosso ikunombolo yetshumi iphethe imiklomelo engu-36, elingana leChicken Inn ekunombolo yesi-11.
IChicken Inn, eqeqetshwa nguJoey Antipas inqoba iTriangle nge 1-0 enkundleni yeGibbo.
U-Antipas utshele iZimpapers Sports Hub ukuthi lonyaka kunzima kubo.
“Kumele sibalekele izembe. Lonyaka sisesihogweni. Ukunqoba umdlalo wethu leTriangle kuzasinika ukuzethemba siyephambili. Kumidlalo emithathu eseleyo kuzamele siqhubeke ngokulungisa lapho esixega khona,” kutsho u-Antipas.
Kumidlalo eseleyo amaGamecocks azadlala leCAPS United (ekhaya), Ngezi Platinum Stars (ekuhambeni) leHighlanders (ekhaya).
