Nkosilathi Sibanda
KULENDODA elolaka olwedlulisileyo, exabane lomngane wayo, qede lapho yamthela ngephethulo, yamtshisa.
Indoda le, uMayibongwe Ngalonde (23), ohlala eWarrengham, koBulawayo watshisa umngane wakhe uMehluli Maphosa njalo ulokhe eselatshwa esibhedlela, kulandela ukulimala.
Kumbiko okhitshwe yiNational Prosecuting Authority of Zimbabwe (NPAZ), isehlakalo lesi senzakala mhlaka 23 Ncwabakazi 2026, ngezikhathi zabo-8 ebusuku, ku-Plot Number 23, eWarrengham.
Kubikwa uNgalonde loMaphosa babesemkulwini beseduze leziko ngesikhathi kusiba lokungazwanani phakathi kwabo. Ukungazwanani lokhu kwaphenduka ingxabano, uNgalonde wakhipha imbodlela elephethulo wathela phezu kukaMaphosa.
UMaphosa watsha kakhulu entanyeni, ezandleni lesiswini.
Indaba le yabikwa emapholiseni, okwabangela ukuthi uNgalonde abotshwe njalo athonisiswe, watholakala elecala lokuzama ukubulala.
“Umantshi uqume ukuthi umsolwa uzahlala ejele iminyaka emine ngemva kokutholakala elecala lokuzama ukubulala umngane wakhe ngokumthela iphethulo lokumtshisa,” kutsho iNPAZ.
I-NPAZ isikhuthaze uzulu ukuthi axazulule ukungezwani ngokukhulumisana kuhle, njalo nxa kungehlula ukuthi bazwanane, badinge usizo lomuntu ongabancedisa ukuthi bakhumisane umlotha.
“Ukusebenzisa udlakela kulicala elisemthethweni njalo abenza izenzo ezinjalo bazathonisiswa ngokugcweleyo kulandelwa umthetho,” kutsho iNPAZ.
