Nkosilathi Sibanda
AMAPHOLISA aseveze ukuthi adinga uVusani Sibanda, isigilamkhuba esahlukumeza izakhamizi eNkayi, njalo osolwa ngokubulala enye indoda kulindawo.
USibanda kubikwa ubethwalise nzima abantu abahlala eduzane lasenzikini yamabhizimusi eNkayi njalo esenza lokhu lomfana oleminyaka engu-15.
Umfana lo esingeke sachaza igama lakhe, usezandleni zamapholisa kukanti uSibanda wabaleka.
Kubikwa ababili laba, baqala ukuhlukumeza abantu kumaviki amathathu adluleyo, ngokutsho kwesikhulumi samapholisa elizweni uCommissioner Paul Nyathi.
UComm Nyathi, ekhuluma lephephandaba likazulu ngoLwesithathu ntambama, uthe uSibanda wayetshaya abantu futhi elenjongo yokubulala.
“Kuloludaba, uVusani Sibanda ubehlasela abantu eNkayi, esebenzisana lomfana oleminyaka engu-15.
“Bakwenze lokhu okwamaviki amathathu. Bebetshaya abantu, bebethusela ngokubabulala,” kutsho uComm Nyathi.
UComm Nyathi uxwayise uzulu ukuthi alimuke ngoba uSibanda uyingozi. Uthe amapholisa aqaphele njalo aphakathi kokumdinga.
“Sicela umphakathi asebenzisane lamapholisa ngalesi isikhathi sidinga uVusani Sibanda.”
Kusenjalo, izakhamizi ebezihlutshwa nguSibanda kubikwa lokhe zihlalele evalweni nanko akwaziwa ukuthi ucatshe ngaphi.
Iphephandaba likazulu lizwe njalo ukuba uSibanda kudala wayiqalisa into yakhe yokuhlukuluza lokulimaza abantu.
