Nkosilathi Sibanda
UMBALISI wesikolo seNemane Adventist High School esiseTsholotsho, esabelweni seMatabeleland North, u-Alexio Sibanda uhlonitshwe kuzococo ze2026 Zimbabwe Impact Awards (Zimpact Awards) ngomsebenzi wakhe omuhle kwezemfundo, ukuqeqetsha lokuqondisa abafundi lokuthuthukisa umphakathi.
USibanda uthole isicoco se-Excellence in Education and Mentorship ngenxa yomsebenzi wakhe omuhle wokufundisa, ikakhulu ukuphumelela kwakhe ukukhipha impumela ye-100 phesenti emihlolisweni ye-Literature in English ku-Advanced Level okweminyaka elitshumi ilandelana.
Kumbiko yokuncoma umsebenzi ekhutshwe ngabahleli bezicoco lezi, uSibanda uphinde wanconywa ngokwenza ukuthi isikolo sibe lempumela engcono kakhulu kuLiterature in English ku-Ordinary Level.
Indlela aqondisa ngayo abafundi iphinde yanceda iqembu le-Quiz lesikolo ukuthi libe zintshantshu zesabelo eminyakeni ka-2024 lo-2025.
“Phakathi kuka-2020 lo-2022, uSibanda wayengomunye wababalisi ababesebenzisa umsakazo ukufundisa iLiterature in English, encedisa abafundi ukuthi baqhubeke ngezifundo ngesikhathi sokuhlasela komkhuhlane weCovid-19.
“Ngokusebenzisa indlela yokuqondisa lokweluleka, uphinde wancedisa abatsha ukubhekana lenhlupho ezithinta izifundo kanye lempilo yabo, ngesikhathi esiza abafundi abavela emulini eziswelayo ukuthi bathole imali zokufunda,” kutsho iZimpact Awards.
Ekhuluma lentatheli ngoLwesine, uSibanda, oselesikhathi esedlula iminyaka engu-15 esebenza engumbalisi, uthe ukuthola isicoco lesi kumenze wakhumbula abantu abamsekela endleleni yakhe yokuphumelela.
“Ekuqaleni ngangingakukholwa, kwakungathi liphupho nje ngizaphaphama. Ngaqhubeka ngizibuza ukuthi, ‘Yimi sibili lo?’ Kodwa ukuthokoza kwangifica lapho sengicabanga ngokuhlonitshwa kwami lokuthi impumelelo le itshengisa lomsebenzi omuhle owenziwe ngabantu abake bangincedisa empilweni.
“Ngizimisele ukuqhubeka ngiqondisa abatsha ngibancedisa ukusebenzisa amandla abo ngendlela ezabenza baphumelele. Umsebenzi wami kawugcini ngokufundisa ekilasini kuphela, kodwa ngifisa lokukhuthaza isizukulwane esizakwenza umehluko omuhle emphakathini,” kutsho uSibanda.
Uthe uzimisele ukuqhubeka ekhulisa abatsha abazasebenzisa ulwazi lamathalenta abo ukuletha intuthuko lokwenza okuhle emphakathini abahlala kuyo.
