admin
YiNtatheli kaMthunywa
KULOMBALISI weSiansundu Secondary eBinga omiswe phambili komthethwandaba weBinga emavikini amabili adluleyo esetheswa icala lokuya emacansini lomfundi okuGrade 7.
Umsolwa uCostan Mupande wetheswa icala lokuya emacansini lomntwana oleminyaka engaphansi kwengu-16.
Ukuthoniswa kwecala leli kudluliselwe phambili njalo umsolwa uphiwe ibheyili.
Kusenjalo uMthunywa uzwe ukuthi izakhamizi zeBinga sezike zayabikela abaqondisi bezemfundo eBinga ngokuhlukuluzwa kwabafundi emacansini ngababalisi.
Omkhulu wezemfundo eBinga uDistrict Educational Officer, uMnumzana Edson Masungo uveze ukuthi kuke kwaba lokungezwani phakathi kwababalisi labazali beSiansundu Secondary ngodaba lwababalisi abahlangana labafundi emacansini.
“Samukele indaba ezinengi eziphathelane lababalisi besikolo lesi besetheswa amacala okuya emacansini labantwana besikolo abangamankazana.
“Kodwa engingakutsho yikuthi silendaba ezimbili kuphela esezathoniswa emthethwandaba, le yiyo eyokuqala kuthi olunye lumelele imvumo evela emahofisini ezemfundo,” kutsho uMnu Masungo.
Intatheli zivakatshele emzini kamsolwa ukuze ziyezwisisa ngodaba lolu. Izakhamizi ezifakaze udaba lolu ezingathandanga ukuvezwa ngamabizo zibikele intatheli ukuthi abanye ababalisi bakule indawo kabaziphathanga yikho nje becina bethandana labafundi.
Kuvele ukuthi ngomnyaka ophelileyo umsekeli kamphathisikolo wahanjiswa emahofisini amakhulu ezemfundo esolwa ngokuya emacansini lomfundi njalo lokhe kungakaveli impumela yokuthoniswa alokhu.
Kuzwakale njalo ukuthi ngenyanga kaNhlangula lonyaka kulombalisi owabanjwa ngumkakhe elele lomfundi.
UMthunywa uzwe ukuthi indaba ezifana lalezi zingaze zichazwe ziyagqitshelwa.
UMsekeli kaMphathintambo wezemfundo yaphansi laphezulu, uSikhwicamfundo Paul Mavhima uveze ukuthi kulicala elikhulu ukuthi umbalisi enze ihlazo elinje.
“Kulicala elikhulu ukuthi umbalisi alale lomntwana wesikolo, ngomthetho kumele axotshwe. Nxa kuyikuthi indaba ezinje ziyenzakala kumele zaziswe abaqondisi bezemfundo okuyibo okumele benze izinqumo belandela umthetho,” kutsho uSikhwicamfundo Mavhima.
Ubuye waveza ukuthi uzadingisisa ngodaba lwesikolo seSiansundu kumqondisi wezemfundo esabelweni seMatabeleland North.
Online Reporter