admin
Cornelius Luphahla
NGOMGQIBELO kuyonale iviki kuzabe kuleBulawayo Music Carnival, eHartsfield Tshisanyama lapho okuzabe kudibene khona abaculi bakoBulawayo ngenhloso yokujabulisa uzulu kanye lokutshengisa umphakathi iziphiwo zabo.
Umkhosi lo uzaqala emini ngo 12 kuze kuyelamula ukudabuka kokusa lapho abaculi abagoqela uSandra Ndebele, Babongile Skhonjwa, Khuliyo, Iyasa, Guluva 2, Siyaya, DJ Slamma, kanye labanye abaculi bakoMthwakazi abazabe betshengisa uzulu ukudla kwamehlo.
UMthunywa ukhulumisane loBabongile Skhonjwa omunye wabaculi abazabe bekhona kulo umkhosi wachaza ukuthi ngalelilanga kuzanyakaza uzulu wonke ngoba uzatshayela ukufa lokuphila.
“Ngalelilanga ngizajabulisa uzulu ngengoma zami zonke ezimnandi. Ngizathi ngingena kuthintitheke ngitsho lomuhlwa emdulini kanye lezihlahleni. Yikho ke okuzabonakala khona ukuthi iziphiwo zokujabulisa uzulu zigcwele lapha koMthwakazi ngoba sizabe siziveza sobala.
“Sinanzelele ukuthi abaculi bakuleli kabananzwa kakhulu kodwa kuqakathekiswa abakwamanye amazwe yikho ke sithe sibe lomkhosi wethu sodwa njengabaculi bakoMthwakazi ukuze kubonakale ukuthi lathi siyenelisa ukujabulisa abantu,” kutsho uBabongile.
Ekhuluma lentatheli umculi uKwabatsha Madolo uveze ukuthi yena ukhangelele ukuvezela uMthwakazi ukuthi laye uyenelisa ukucula njengabaculi bakwamanye amazwe.
“Ngikhangelele ukuthi lelilanga yilo elizaveza obala ukuthi koMthwakazi kulabaculi abedlula abakwamanye amazwe noma nje inengi lalapha belingakakunanzeleli lokhu. Ngalokhu ke ngizaphekela umphakathi ezimnandi kuphela uze ufise ukuthi ngabe kakupheli ngoba uzajabula okwamagama,” kutsho uMadolo.
Umculi uSandra Ndebele njengomunye wabaculi abazabe bekhona kulo umkhosi uchaze ukuthi ngalelilanga uzatshayela uzulu idlalade lakhe elitsha.
“Emkhosini lo yikho engizatshayela uzulu idlalade lami elitsha elithi Izenzo njalo yikho engizaveza khona ukuthi sengiphendukile njengoba ngangisakhulisa umntanami. Uzulu ngizamtshengisa ukudla kwamehlo ngoba inengi labantu kalikalizwa kahle idlalade lami elitsha,” kutsho uSandra Ndebele.
Ekhuluma loMthunywa uNkanyiso omunye wabaculi be-hip-hop ozabe ekhona kulo umkhosi uveze ukuthi uzatshengisa uzulu ukuthi kungani wathola isicoco kumnyaka ophelileyo kwezomculo.
“Mina ngifuna ukujabulisa uzulu aze abone ukuthi kungani ngathola isicoco kumnyaka ophelileyo ngedlalade lami elitsha elithi Colour of Dreams. Noma nje ngingumculi omutsha kodwa ngizaveza obala ukuthi ngimutsha ngokwaziwa kodwa ngicula njengabaculi abadala,” kuphetha uNkanyiso.
Online Reporter