admin
Khulu ngilomnyaka ngihlala lomfazi. Sonke lesisikhathi ubesenza kahle ehlonipha esenza yonke into eyenziwa ngumuntu wesifazane. Wasuka wathola umsebenzi lapho asebenza kuze kube sebusuku kwavela kwaqala indaba. Kulezinsuku uselala engekho endlini, usedelela, kasangihloniphi ngitsho, angisamazi okwezinyanga embhedeni.
Manje Khulu inkinga ngiyamthanda lumuntu futhi ngiba lomcabango wokuthi mhlawumbe wangidlisa. Ngicela ungisize ungibonise indlela.
Impendulo
Ibuhlungu inkinga ophakathi kwayo mzukulu. Nxa kuyikuthi ukuthathana kwenu kwabayisivumelwano sabazali, ayibuyele leyo indaba lapho eyaqalisa khona. Kungasikho ukuthi iyabe ilanda ukuthi lehlukane ngoba lokhu yinto embi kakhulu. Lapha liyabe libikela abadala ukuthi bamkhuze. Akusoke kubensuku ezingaki isikhuni singabonakalanga sibuya lomkhwezeli.
Ngicela ubeyindoda elesibindi, uthumele umuntu ohloniphekayo kuye ayebatshela ngohlupho obhekane lalo. Umtshele ukuthi akunanzelele ukuthi lokhu kuziphatha abanengi kwababulala. Zama ngamandla akho ukuthi linto uyibikele abadala.
Ngimtshele njani ngomntanami ophadle
Ngihlala lomkami labantwana abangu-2. Uhlupho ngileyinye ingane ngaphandle unkosikazi akayazi. Ngifuna abantwana bami bakhule besazana, ngingamtshela kanjani unkosikazi Khulu ngendlela engasoze imephule umoya?
Impendulo
Andubana sikhulume ngokumtshela kwakho, umntwana lo ongaphandle nxa emdala kulalabo olabo endlini akulahlupho lokumbikela, ngoba uzamtshela umkakho uthi angizange ngikutshele ukuthi ngilomntwana siqala ukuthandana ngoba ngangisesaba ukuthi uzangala.
Kodwa khathesi wena usukhona sithandwa sami, lomthetho wothando lwami emntwaneni wethu uthi kumele abuye ngekhaya. Nxa kuyikuthi umntwana lo umzele selithethene kutshengisa ukungathembeki kwakho kuye, kodwa noma kunjalo, uyasibikela isithandwa sakho.
Ukubika kwakho kufuna icebo. Ungacela umuntu omdala ukuthi akuphathise ukwethula indaba le kumkakho. Umtshele ukuthi into oyenzileyo imbi njalo uyakwazi ukuthi uphambanise isifungo sokuthembeka kuye.
Online Reporter