Mthabisi Tshuma
ABACULI abadumileyo abavela kweleSouth Africa kukhangelelwe ukuthi batheleke edolobheni leGwanda kuyonale inyanga kaLwezi, lapho abazathokozisa khona uzulu ngemcimbi eminengi belungiselela ikhefu lokuphela komnyaka.
Indawo yokuzithokozisa edumileyo eyePhoenix Shisanyama izakwemukela uTMan Express, uDJ Zinhle loYoung Stunna emicimbini ezathatha amaviki amathathu.
UTMan Express, odume ngengoma ethi Remember, nguye ozavula imcimbi le mhlaka 7 Lwezi.
Uzalandelwa nguDJ Zinhle, ozakuba ngumculi omkhulu emcimbini lapho abantu abazagqoka khona ezimhlophe kuphela, mhlaka 14 Lwezi. UYoung Stunna yena uzaphetha imcimbi le mhlaka 21 Lwezi.
Umhleli womcimbi njalo engumnikazi wePhoenix Shisanyama, uTapiwa “Gandz” Gandiwa, uthe imcimbi le izavulela labaculi bakuleli amathuba okutshengisa iziphiwo zabo lokuphakamisa amagama abo kwezomculo.
“Sizakwemukela abanye babaculi abadumileyo, asebezakhele amagama njalo abaphumelelayo kusizwekazi se-Afrika. Ukufika kwabo akusoze kuthokozise abalandeli babo kuphela, kodwa kuzanika labaculi bakuleli ithuba lokukhulisa lokuthuthukisa amagama abo.
“Siphathekile ngokukhetha abaculi abasacathula ukuthi babe lethuba lokuba yingxenye yemcimbi le, siqhubekela phambili ngombono wethu wokuvulela abaculi bakithi amathuba okuphumelela lokuzakhela udumo,” kutsho uGandz.
