Lovemore Dube
IQEMBU leHighlanders selinxuse abalandeli balo lentatheli ukuthi bakhethe abadlali ababona bedlale ukwedlula abanye kuleliqembu, njengoba lithakazelela ukufikisa iminyaka elikhulu.
IHighlanders yasungulwa ngo-1926 ngabazukulu beNkosi uLobengula, uAlbert loRhodes.
Abalandeli baphiwe ithuba lokuthi bakhethe abadlali abalitshumi lanye ngendawo zokudlalela.
UMorris Brown Mpala ongumsekeli kamgcinisihlalo uKindman Ndlovu uthe kungabakuhle ukuthi bazwe ukuthi abalandeli bona bathini.
“Iqembu ngelabantu njalo kuhle ukuthi sizwe ukuthi bona bathini ngabadlala kudala,” kutsho uMpala.
UMpala uthe lokhu kuhle ngoba kwenza abantu bakhumbule imbali yeqembu labadlali. Uthe lentatheli kuhle ukuthi lazo zizwakale.
Iqembu leHighlanders selibe labadlali abambalwa abaphakamise ilizwe ngokuyadlala kuhle phandle.
Abadlali laba bagoqela uBruce Grobbelaar, Peter Ndlovu, umuyi uAdam Ndlovu, Rahman Gumbo, Mercedes Sibanda, Willard Khumalo, Madinda Ndlovu, Noel Kaseke, Zenzo Moyo, Joel
Luphahla, Obidiah Tarumbwa Methembe Ndlovu, Mkhokheli Dube, Eddie Mashinya, Honour Gombami lo Vusa Nyoni.
Kukhanya nje ukuthi kuzaba lobunzima ukuphuma lamabizo ngenxa yokuthi zinengi ingcitshi ezadlalela leliqembu kusukela ngo-1926.
Intatheli yeZimpapers, uSikhumbuzo Moyo uxwayise ukuthi kungaba kuhle kukhangelwe ngeminyaka elitshumi ukuthi kubelula.
Balutshwane abantu abangakhuluma ngabadlali abadla ubhedu kungakafiki isikhathi sikaRoger Muhlwa loJames Mangwana-Tshuma.
