YiNtatheli kaMthunywa
IKHANSILI yakoBulawayo isidlulisele phambili uhlelo lwe-Operation Hlanzeka obelumele luqale ngeSonto mhlaka 1 Lwezi, ukuze iqhubeke ibonisana labathengisa ezitaladeni labanye abangekho emthethweni.
Kumbiko okhitshwe phakathi kwaliviki, ikhansili ithe umsebenzi lo umisiwe okwakhathesi njalo uzaqalisa ngemva kwamaviki amabili.
Uthe ukudluliselwa phambili lokhu kuhlose ukunika abathengisi abasebenza endaweni ezingavunyelwayo ithuba lokuthuthela endaweni ezisemthethweni zokuthengisela, lokuthi badilize izakhiwo ezingekho emthethweni njalo basuse impahla zabo.
Ikhansili ithe ifuna ukuqhubeka ikhuluma labo bonke abathintekayo ukuze kutholakale indlela yokwenza umsebenzi lo ngaphandle kokuphazamisa uzulu.
“Ikhansili yakoBulawayo izimisele ukulalela izikhalazo zikazulu njalo iqhubeka ibonisana labo bonke abathintekayo. Umsebenzi lo uzaqalisa njalo ngemva kwamaviki amabili. Isikhathi lesi sinika abathengisi abasebenza endaweni ezingavunyelwayo ithuba lokuthuthela endaweni ezisemthethweni, ukudiliza izakhiwo ezingekho emthethweni njalo lokuthi basuse impahla zabo,” kutsho umbiko lo.
Lanxa kunjalo, ikhansili igcizelele ukuthi ukuthengisela endaweni ezingavunyelwayo, okugoqela eceleni kwemigwaqo, endaweni zokupaka izimota kanye lasezindleleni zabahamba ngenyawo, akuvunyelwa.
Ikhansili ivumile ukuthi amabhizimusi amancane lasakhula (MSMEs) adlala indima eqakathekileyo ekutholeni kwabantu imali yokuziphilisa lokuthuthukisa umnotho wedolobho, kodwa ibuye yakhuthaza abathengisi ukuthi basebenzele endaweni ezibekelwe ukuthengisa.
“Wonke amabhizimusi amancane lasakhula labanye abathintekayo bakhuthazwa ukuthi balandele imithetho ngokuthuthela endaweni ezivunyelweyo zokuthengisela. Sicela bonke abathintekayo ukuthi basebenzisane leziphathamandla ngesikhathi lesi ukuze umsebenzi uhambe kuhle,” kuqhubeka umbiko wekhansili.
NgoMvulo amapholisa ekhansili abhidlize izakhiwo eMpopoma Outspan Furniture Manufacturing Complex, indawo eyaziwa kakhulu ngokuthi kuse-Sipamprikeni.
Ukudluliselwa phambili kwe-Operation Hlanzeka kuza ngesikhathi lapho ikhansili iqhubeka ngemizamo yokulungisa idolobho lokuqinisekisa ukuthi ukuthengiselana kwenzakala endaweni ezisemthethweni.
Kusenjalo, abathengisi beSpampurikeni bacela uncedo ngemva kokubhidlizwa kwendawo zabo
Kubikwa kulabathengisi abedlula i-400 abasebenza kulindawo. Bacele uHulumende ukuthi abancede bathole ezinye indawo zokusebenzela lokubiselwa kwempahla yabo eyathathwa ngesikhathi kubhidlizwa izakhiwo ezingekho emthethweni ngoMvulo.
Baveze lokhu ngesikhathi uMphathintambo obona ngokwenzakala edolobheni lakoBulawayo, uJudith Ncube ethekelele kulindawo ehamba lamalunga eJoint Operations Command ngoLwesibili.
UNcube uxoxisane labathengisi ngenhloso yokuzwa izikhalazo zabo lokudinga izixazululo.
Uthe ukuvakatsha kwabo kuveze ukuthi indawo le isigcwele kakhulu, njengoba inani labathengisi selikhuphuke lisuka ku-100 laya kwabedlula 400.
Kubikwa basebenzisa izambuzi ezimbili.
“Esikunanzeleleyo yikuthi indawo le isikhule kakhulu. Abantu ababekade beyi-100 kumbe 200 khathesi sebengaphezu kwe-400, kodwa balezambuzi ezimbili kuphela. Lokhu kuyingozi empilweni yabo,” kutsho uNcube.
Uthe abathengisi bavumile ukuthi ezinye izakhiwo bazakha bengalandelanga imithetho ebekwe yikhansili, kodwa uthe kubalulekile ukuthi iziphathamandla zilalele izikhalazo zabo ukuze kutholakale isixazululo.
“Bayavuma ukuthi ezinye izakhiwo bazakha bengalandelanga imithetho. Kodwa nxa ukhuluma labantu, ubalalele njalo uzama ukuzwisisa uhlangothi lwabo, kuba lula ukuthi lithole indlela yokulungisa udaba ngokuthula.
“Yikho esikwenze ngokuyavakatshela indawo le.”
UNcube uthe uHulumende usekhulumisana lekhansili yakoBulawayo ngenhloso yokudingisisa indlela ezinganceda abathengisi laba.
Uthe uthemba ukuthi ikhansili izazihlolisisa izikhalazo zabathengisi ukuze kutholakale indlela ezakwenza ukuthi umsebenzi uqhubekele phambili kungelani lokuthi imithetho yekhansili iyalandelwa.
“Siyaqhubeka sikhulumisana lekhansili njalo sithemba ukuthi izazihlolisisa kuhle izikhalazo zabathengisi. Kumele sizame ukuthola izixazululo ezizanceda ukuthi isabelo sethu siqhubekele phambili. Yikho okufunwa nguhulumende,” kutsho uNcube.
