Lovemore Dube
ABATSHOVA amabhayisikili abangu-300, bazahlangana emjahweni weNedbank Tour de Great Dyke oqala ngoLwesine eSelous, eduzane lomgodi weZimplats eMashonaland West.
Umjaho walonyaka ngowetshumi kusukela waqalwa njalo ujonge ukukhuthaza ezemidlalo, ukwazisa uzulu ngokuqakatheka kwezimbiwa ekuthuthukiseni umnotho welizwe lokulondolozwa kwemvelo.
Okhulumela abaqoqi bomncintiswano lo, uMoses Charedzera, uthe abatshovayo bazasuka eSelous baye eKwekwe ngoLwesine, lapho abazalala khona.
Uthe iGreat Dyke, esuka eMatabeleland South isiya eMashonaland Central, indima eqakathekileyo ekuthuthukiseni umnotho welizwe ngenxa yemigodi eminengi ekuyo, eqhatsha izisebenzi njalo ivuselela ukukhula kwamadolobho.
Uthe indawo lezi sezilentuthuko ebonakalayo ngokuba lezikolo, izibhedlela lezitolo ezisiza izisebenzi lomphakathi ohlala lapho.
“Silomjaho wethu weminyaka yonke oweNedbank Tour de Great Dyke. Sokungumnyaka wetshumi sitshova amabhayisikili. Enye inhloso yikulondoloza imvelo ngoba ukuqakatheka kwayo empilweni kukhulu.
“Esikutholayo emjahweni lo sikunikela kuGifted Children’s Foundation, esincedise abanye abantwana ukuthi baqhubeke ngemfundo baze bayefika emayunivesithi,” kutsho uCharedzera.
Uthe abatshova amabhasikili bazasuka eSelous ngoLwesine ekuseni bedlule besiya eKwekwe, lapho abazalala khona. NgoLwesihlanu bazaqhubeka lohambo besiyalala e-Unki Mine, phambili kweShurugwi.
UCharedzera uthe umncintiswano uzaphetha ngoMgqibelo eZvishavane, lapho abatshova amabhayisikili bezancintisana khona ngebanga elingamakhilomitha angu-80.
Ngakwelinye icele, uNkulumo Dube, obekade engomunye wabaqoqi bomjaho lo njalo emele abatshova amabhayisikili, uthe kasoze enelise ukuba khona lonyaka ngenxa yezizatho ezithile.
“Ngibanjwe ngokunye lapha eBotswana ngalokho kangisoze ngibekhona lonyaka. Ngibafisela uhambo oluhle bonke abazabe betshova amabhasikili,” kutsho uDube ngoLwesibili.
