Online Reporter
Nkosilathi Sibanda
KUZABUSA bani kwezomculo we-rhumba lonyaka?
Yiwo umbuzo osemlonyeni wabathandi labalandeli bomculo we-rhumba asebelinde ngabomvu umkhosi wezicoco we-Rhumba News ZW ozaqhutshwa ngoNtulikazi.
Lonyaka umkhosi wezicoco zomculo we-rhumba lo ukhangelelwe ukuthi uphakamise abaculi abasacathula, lalabo abangakatholi udumo, inhloso ingeyokuba khuthaza lokubabonga emsebenzini wabo wokujabulisa uzulu.
Umkhosi lo owenziwa minyaka yonke, njalo abaqoqi bezicoco, iRhumba News ZW babike ukuba lonyaka abaculi labathandi bomculo kumele bakhangelele okukhulu.
Batshele iphephandaba likazulu ukuthi umkhosi lo uhlelwe ukwenziwa mhlaka 26 Ntulikazi, eVictory Theatre, eJohannesburg. Izicoco lezi ngezokubonga lokuhlonipha abaculi be-rhumba kuphela.
“Siyajabula ukubika ukuthi iRhumba News ZW yamukelwe kakuhle ngabaculi labalandeli bomculo. Ngemizamo yethu, sihlose ukukhuphula izinga lomculo we-rhumba, sinikeze abaculi bawo inkundla ukuze bafinyelele abantu abanengi.
“Sikholwa ukuthi umsebenzi wethu ngeke uphakamise abaculi kuphela kodwa uzaphakamisa ingatsha zonke zalumculo. Lonyaka, umkhosi wezicoco uzabe umhlaka 26 Ntulikazi, eVictory Theatre,” kutsho umbiko othunyelwe iphephandaba likazulu ngabaqoqi bezicoco.
Babike njalo ukuthi kuzabongwa labantu kanye lamaqembu aphathisa umphakathi kumisebenzi etshiyeneyo.
Ngo-2024 kwanqoba uMr Bones ngengoma yakhe ethi, Bangihlangabeze nge-case, eyathola amavoti angu-50 956. Kwalandela iNsimbi zeZhwane ngengoma yabo, Ingqinamba, eyaba lamavoti angu-50 255
