Online ReporterFungai Muderere
ABADLALI be-pool abafuna ukuncintisa ngaphansi kweBulawayo Province Pool Association (BPPA) kumele bagijimele emahofisini alinhlanganiso, babhalise amabizo, andubana kuvalwe uhlelo.
Ukubhalisa ukudlala kuvalwa mhlaka 25 Nhlolanja, ngokutsho kwenkokheli zeBPPA.
Unobhala walinhlanganiso uNomore Mudzvidziwa uthe abadlali abaze ngokuphangisa ngoba ukubhalisa akusoke kwedluliselwe phambili.
“Isikhathi kasilindi muntu. Ukubhaliswa kwabadlali kuligi yethu kuvalwa mhlaka 25 Nhlolanja 2026. Oseleyo usele,” nguMudzvidziwa lo.
Ubike ukuba iligi izaqala mhlaka 28 Nhlolanja.
“Iligi yethu izaqalisa kulandelwa ikhalenda yeZimbabwe Pool Association (ZIPA). Imidlalo yokuvula isizini, andubana kuqalwe iligi, izakuba mhlaka 21 lamhlaka 22 Nhlolanja. Wonke amaqembu azadlala.”
Kubikwa umdlali iqembu ngeqembu lizabhadala i-US$300 kubadlali abalitshumi lanhlanu.
“Amaqembu ayenelisa ukuthi abhadale i-US$150 kusiyafika umhlaka 25 Nhlolanja, enye ingxenye ibhadalwe kusiyafika ku 30 Mabasa.
“Ukwehluleka ukulandela lesi isivumelwano, imidlalo yeqembu izakuba ngama-walkover. Imbhadalo yonke ihanjiswa ebhanga,” kutsho Mudzvidziwa.
Uqhubeke wathi bonke abadlali ababhaliswe emthethweni babhadala indleko ethile kuZimbabwe Pool Association (ZIPA), Sport and Recreation Commission (SRC).
