admin
YiNtatheli kaMthunywa
USAZIWAYO kwezenguqu uEdzai Kasinauyo usekhulume kwazwela exwayisa abadlali abasakhulayo kuleli ukuthi bahlose ekuthuthukiseni ubungcitshi babo ukuze bathole amathuba okudlalela amaligi aphezulu.
UKasinauyo, owaziwa njalo engumaneja wabadlali ukhulume lokhu encoma ubudlelwano obuphakathi kwamaqembu akwamanye amazwe lamakolitshi enguqu akuleli.
“Kuqakathekile ukuthi abadlali bavuse ingqondo baphakamisa indlela abadlala ngayo ukuze baphumelele kunguqu.Kuyaziwa ukuthi iminyaka yokudlala ibhola imlutshwana ngakho nxa umdlali engekela ukuhlakanipha engazibona esehlezi phansi.
“Esikukhuthaza abadlali kanye labaqeqetshi yikuthi baphakamise amathalenta abo benelise ukudlala kumaligi aphezulu kulawo esilawo eZimbabwe,” kutsho uKasinauyo.
Unikeze umzekeliso wabadlali asebephumelele ngokudlala inguqu phetsheya kwesizwe ababalisa ezadla ubhedu uBenjani Mwaruwari, uPeter Ndlovu, uOvidy Karuru, uVusa Nyoni, uEsrom Nyandoro labanye.
Ukuthengwa kwabadlali laba kubikwa kwavusa inkophe zabanengi kunguqu ababesithi iligi yakuleli ayisela sisindo ngoba isilahlekelwa ngabadlali kusala labo abangaziwayo.
“Loba nje ukuthengwa phetsheya kulinyathelo elihle, angiboni ukuthi kuloncedo kuligi yakithi. Abadlali bethu abanengi sebechaphela eGoli ngoba kithi akulamathuba njalo imali incinyane.
“Inguqu yethu isingeyabafana abadlala isizini eyodwa behambe. Akumelanga kube njalo,” kutsho usaziwayo wenguqu lo.
Amathimu amanengi kweleSouth Africa kubikwa ayasuthiseka ngabadlali bakuleli. Lokhu kubonakele ngabadlali abanengi abanxuswa ngabaqeqetshi bamathimu eligi yeAbsa.
Umaneja weqembu leKaizer Chiefs uBobby Motaung wake wabika kumaphephandaba esithi iqembu lakhe libona ikusasa enhle nxa ilabadlali beZimbabwe abatshisayo.
“Iligi yeZimbabwe siyayilandela kakhulu. Silenhloso yokuthi sibelekusasa enhle kunguqu. Abadlali abalobungcintshi abaphuma eZimbabwe lakwamanye amazwe bayikusasa yethu,” kutsho uMotaung.
Online Reporter