admin
Johas Moyo
BAHLEZI bephethe izibindi ngezandla abazali abalabantwana abafunda eBere High School, eMashava kulandela ukuzwa ngeqembu labafundi okubikwa ukuthi lidukisa abanye ngokubangenisa kukholo lukaSathane.
Abasiki bebunda babikele uMthunywa ukuba sokunzima ukufunda kulesisikolo ngoba abafundi kunye lababalisi sebehlalele evalweni besesaba ukuthi mhlawumbe labo bangangeniswa kunkolo le eyaziwa ngokuphatheka ngakho konke okubi.
Kubikwa kumaviki amabili edluleyo kuqale ukuvela izehlakalo ezingazwisisekiyo njalo ezitshwaqisa umzimba kulesisikolo nanko phela kukhona abathi babone abanye abafundi bemunya igazi labanye abafundi njalo kukholelwa ukuba benza eminye imithanithani eyesabekayo.
Omunye umfundi wakulesisikolo owenza uFomu 3 uthe abasahlalisekanga esikolo lesi ngoba abafundi abenza lokhu bayaziwa.
“Akusafundeki lapha esikolo njalo abafundi abenza imithanithani kaLusifa siyabazi.
“Ngokutsho kwabantu obakhokhelayo ngoyinkazana okuFomu 4 njalo kukhanya abamncedisayo labo bangamantombazane.
“Lokulala ebusuku asisalali ngoba kuthiwa bayenelisa ukukulanda ngekhaya bakwenze umathanda wena ulele, asazi ukuthi bakufunde ngaphi lokhu kodwa iqiniso yikuthi abafundi bashaqekile,” kutsho lumfundi.
Omunye njalo umfundi ongumfana owale ukuqanjwa ngebizo ngokwesaba ukuhlaselwa ngabafundi besathanizimu uthe ababalisi baqala besithi ngamanga kodwa abanye labo sebekubona ukuthi kukhona okutshaya amanzi esikolo.
“Ukuze lawe bakungenise kule indaba bakunika iziwiji, ama-Jiggies kanye lamaputi uthi ungadla uyabe usubhudlukele phakathi kwayo imisebenzi yabo.
“Ababalisi abakukholwayo lokhu sebaqala imithandazo esikolo ngokwesabela abantwana labo ngokwabo.
“Kucatshangelwa ukuthi inani labafundi asebangeniswa kukholo loli liyedlula amatshumi amahlanu nanko phela abanye bayabe bengazi ukuthi bayasetshenziswa,” ngumfundi lo obetshaqekile.
UTinodamwari Nyandoro ohlala duze kwesikolo leso ubikele intatheli ukuthi yena wazibonela ngawakhe amehlo imihlola eyenziwa ngabantwana abangamantombazana ngoba kuyibo okubikwa ukuthi bazinkokheli zalolukholo.
“Abantwana laba baxhwalile sibili njalo bahlakaniphile. Bayazi ukuthi amadoda awayiwa ngezidwaba kungakho-ke bayazikhombisela amadoda.
“Ungavela uvume lawe uhle uqale ukufikelwa ngumoya wokumunya igazi labantu.
“Sike sezwa kuthiwa umholi wabo okuFomu 4 wanyamalala okwensuku ezimbili waphenduka eselamandla. Phela akulamuntu owenelisa ukumkhangela emehlweni ngitsho bona ababalisi,” kutsho uMnu Nyandoro.
Umholi wabo waqalisa wanyamalala okwensuku ezimbili engaziwa lapho ayekhona, kulapho abuya selamandla njalo sesenza imigqa engapheliyo njalo usebenza lamantombazana abayisitshiya galo mbili.
UMnu Nyandoro uphethe ngokuthi inhloso yamantombazana la yikujoyinisa abanye abantwana njalo kubikwa banengi asebangeniswa kukho bengakwazi.
Omunye wababalisi bakuleso sikolo ongathandanga ukuqanjwa ngebizo uvumile ukuthi kuyenzakala konke lokho okutshiwo ngabantu njalo kudala kwaqalisa, kodwa amaviki amabili lawa kulapho osekubhahe khona njengoba kukhanya obakhokhelayo sewathwasiswa wathola amandla ayewadinga.
“Sakubona kudala ukuthi abantwana basetshenziswa ngama-satanist kodwa kasikaboni abaphathi bethu bedingisisa ngakho, ngokunjalo lathi kasilawo amandla okuveza imfihlo yesikolo ngoba singalahlekelwa yimisebenzi yethu,” kutsho lumbalisi.
Into eyisimanga yikuthi akukaze kube lomntwana oletha umbiko ngokuhlukuluzwa, sekungani umoya wakhona bayawuthanda kumbe uyabalalisa imicabango,” kutsho umbalisi lo.
Isikhulumi samapholisa eMasvingo uInspector Charity Mazura uthe useHarare kakezwa lutho ngaloludaba.
Online Reporter