admin
Johas Moyo
SEBEPHELILE omakorokoza esigabeni seKwekwe emgodini omdala ongasasetshenziswa weGwizo nanko phela bagamulana njalonje kuleyondawo kubangwa igolide, uMthunywa ukuzwile lokho.
Kubikwa sebedlula itshumi abantu asebeganyuliwe kunyanga ezintathu ezedluleyo.
Kucatshangelwa ukuthi ingozi zabantu abafela emgodini lo yizo ezibangela ukuthi kuhlale kulabomakorokoza abalimazanayo kule indawo.
Iphephandaba likazulu kunyanga ezimbalwa ezisanda kwedlula like labika ngabanye omakorokoza abatshaywa ngamagetsi bafa emgodini lo.
Ekhuluma loMthunywa uMlamuli Mangena ongomunye wezakhamizi zakuleyo ndawo uveze ukuthi sebehlalele evalweni kule indawo ngoba behlala bekhuthwa ngamahloka.
“Indawo le isiyingozi kithi abadala kanye lasebantwaneni bethu. Sesihlezi siphethe izibindi ngezandla ngenxa yokuba omakorokoza laba nxa sebesilwa kabakhethi ukuthi batshaya bani lokhu kwenza sesabele ngitsho lempilo yabantwabethu,” kutsho uMnu Mangena.
Esinye isakhamuzi esikhulume loMthunywa ngaloludaba esilomkaso ongumakorokoza owake waganyulwa uNkosazana Linda Sibindi uthe uhlupho olukhona emgodini lo yikuthi akulamuntu owukhangelayo okwenza otsheketsha benze santando.
“Umgodi lo kawulamnikazi, abantu benza umathanda nxa kungadubuka imali amakorokoza la ayaqala ukulwa engamaqembu.
“Lokhu yikho osekusenza impilo zabo zibe sengozini. Umkami seganyulwe okwedlula kathathu kuleyondawo ngoba laye ukuqembu elifuna ukukhokhela bonke otsheketsha,” kutsho uNkszn Sibindi.
Uqhubekele phambili esithi olunye uhlupho ngomgodi lo yikuthi kubuya labantu abavela khatshana bezogebha okwenza kucine kusiba lokungazwisisani.
“Okudanisa kakhulu yikuthi kubuya labantu abavela endaweni ezehlukeneyo ezikhatshana okuyibo abafika belwisane labantu abahlala kule indawo bacine sebegamulana,” kutsho uNkszn Sibindi.
UMnu Mangena ungezelele wathi abakhokheli kumele bavale umgodi lo ukuze abantu baphephe engozini yokuganyulwa kule indawo.
“Kuyasidanisa kakhulu ukuthi inkokheli kaziwuvali ngani umgodi lo wona uyingozi njengoba abanye abantu sebeze balahlekelwa zimpilo zabo kule indawo,” kutsho uMnu Mangena.
Imizamo yokukhulumisana lokhansila wakule indawo uthe yehlule ngoba ucingo lwakhe belungangeni.
Online Reporter