Online Reporter
Ethel Ncube
IZAKHAMIZI zesigabeni seGwanda ezilahlekelwe ngobabhemi bazo, sezikhuthazwe ukuthi maviki wonke ngoLwesithathu baye esikolo seManama Primary lapho okuyabe kubuthaniswe obabhemi ababetshontshiwe.
UMgcinisihlalo weGwanda Anti-stock theft Association, uMnumzana Victor Sibanda uthe izakhamizi ezilahlekelwa ngobabhemi bazo kumele zifike esikolo seManama Primary ngoLwesithathu maviki onke, zizodinga obabhemi bazo.
Kubikwa obabhemi abahanjiswa esikolo lesi ngabayabe betshontshiwe, kudingwa abanikazi babo ukuthi babathathe.
“Kuviki ephelileyo besilabobabhemi abangu-16 esikolo seManama. Abane bakhona bathathwa ngabanikazi. Oyedwa wayengoweBeitbridge, abanikazi sebabuya lamaphepha akhe aqondileyo bamthatha.
“Abanye obabhemi akade sibabukisa ngabathethwe kwenye indoda okunakanelwa ukuthi ilisela lezifuyo.
“Sikhuthaza labo abacatshelwa yizifuyo zabo ukuthi bayevulisa amadokhethi okutshontshelwa izifuyo ukuze kubelula ukulwisa amacala okutshontshwa kwezifuyo,” kubika uMnu Ndlovu.
Ugcizelele ukuthi abantu bangekeli ukufika eManama Primary bezodinga obabhemi babo ngoba maviki onke ngoLwesithathu bayabe bebase kule indawo.
“Sikhuthaza izakhamizi ukuthi zingezwa kufakwa isimemezelo esifana lalesi singaze zathandabuza ukuzodinga izifuyo zazo kule indawo ngoba njenge Anti-Stock theft Association sincedisana lazo izakhamizi ukuthi silwise ukutshontshwa kwezifuyo.
“Esiyabe sikufuna nje yikuthi umuntu abuye lencwadi yakhe yomtshiso ngoba amasela ayacitsha imitshiso bafake eyabo kodwa eminye iyasala ikhanya, kungakho ungabuya lamaphepha akho sikhangele, usulelungelo lokuthatha isifuyo sakho.
“Sikhuthaza futhi abafuyileyo bonke ukuthi bafake labobabhemi babo umtshiso ukuze nxa bangatshontshwa kubelula ukuthi babathole kusetshenziswa umtshiso,” kutsho uMnu Sibanda.
