Nkosilathi Sibanda
UKUBUYELA kweHwange FC kuligi enkulu yenguqu iPremier Soccer League (PSL) sekuthokozise abalandeli beqembu, ngemva kokuthi lithole isicoco sePacific Breeze Southern Region Soccer League.
Ekhuluma lephephandaba likazulu ngoMvulo ekuseni, umgcinisihlalo wenhlanganiso yabalandeli uLisutu Ndlovu, ubonge abalandeli, abaphathi benkampani yeHwange Colliery Company
Holdings abaqeqetshi labadlali ngokusebenzisana okwenze ukuthi iqembu libuyele kuligi enkulu.
“Ngimele abalandeli beHwange FC ngithanda ukubonga ngenhliziyo yami yonke abalandeli bethu abathembekileyo, abaphathi benkampani, abaqeqetshi, abadlali labo bonke ababa lengxenye enkulu ekuncedeni iqembu lethu esilithandayo ukuthi libuyele kuPremier Soccer League.
“Ukunqoba kwethu iBulawayo Warriors kube yinto eqakathekileyo. Ukubuyela kuligi enkulu kutshengisa ukuzimisela, ukubekezela, ukusebenza nzima,” kutsho uNdlovu.
Uqhubekele phambili ebonga abalandeli ngokuma leqembu lanxa lalihlangana lobunzima.
“Impumelelo le ngeyenu njengabalandeli, njalo ingeyabadlali labaqeqetshi. Sibonga njalo abaphathi benkampani ngokuqhubeka besekela,” kutsho uNdlovu.
IHwange ivikele isicoco sayo sokubuyela kuligi enkulu ngoMgqibelo, ngemva kokunqoba iBulawayo Warriors 1-0 emdlalweni obudlalelwa eWhite City Stadium, koBulawayo.
Umqeqetshi weqembu uNjabulo Dube uthe: “Ngiswele amazwi. Kube luhambo olude njalo sihlangane lokuncintisana okukhulu. Amaqembu amanengi ayesenza kuhle njalo umdlalo ngamunye
kithi wawufana lokuthi ngowokucina. Kodwa ngiyathokoza ngokuthi siqhubeke zibambene njengeqembu njalo sazinikela,” kutsho uDube.
IHwange ihlohle amabhola angu-58 njalo yangenelwa ngayisikhombisa kuphela.
