Nkosilathi Sibanda
UKUNIKEZWA kweZimbabwe isihlalo sokukhokhela inhlanganiso yeCommon Market for Eastern and Southern Africa (COMESA) kuvulela abalimi lamabhizimusi ezokulima amathuba okufinyelela imkambo emikhulu emazweni edlula i-21, lapho okulabantu abedlula izigidi ezingu-650, nxa kuqathaniswa labantu abaseZimbabwe.
Lokhu kuvezwe nguMphathintambo wogatsha lwe-Agriculture, Mechanisation and Water Resources Management uDokotela Anxious Jongwe Masuka, oveze ukuthi iZimbabwe ilamandla okuthengisa amabele, igwayi, umumbu lezilimo ze-horticulture kwamanye amazwe.
Uthe ukuba khona kwemkambo emikhulu kuletha ithuba lokwandisa ukuthengiswa kwezilimo kwamanye amazwe lokuthuthukisa amabhizimusi acubungula izilimo ukuze ilizwe lithengise.
“Ngikholwa ukuthi i-COMESA ivulela iZimbabwe ithuba elikhethekileyo lokuthengisa impahla yayo emkambo emikhulu. Iphinde ivule amathuba okuthuthukisa amabhizimusi acubungula impahla yezokulima, ukuze sithengise okunengi,” kutsho uDkt Masuka kumbiko okhitshwe lugatsha enkundleni zokuxhumana.
Uthe i-COMESA iphinda njalo ivule amathuba okuqinisa ukutholakala kokudla, ukwabelana ulwazi ngemitshina yakulezinsuku, lolwazi ngokuguquka komkhathi.
“Amazwe angasebenzisana njalo ekuxwayiseni uzulu ngengozi zokungani kuhle kwezulu kanye lokungenziwa ukwenqabela ukulahlekelwa kubangelwa yisimo lesi sezulu.
“Umlayezo kubalimi lamabhizimusi ezokulima ucacile. Limani likhangele umkambo, yehlisani indleko, landelani izimiso zomhlobo wempahla njalo licubungule izilimo elizweni ukuze lithengise lakwamanye amazwe.”
