admin
Ncekwenhle Ncube
NJENGOBA isikhathi sezulu sesiqalile imikhaza isizabakhona egangeni kungakho abalimi bakhuthazwa ukuthi ngesikhathi becabanga ukudibhisa izifuyo zabo bengekeli ukudibhisa imbuzi zabo ngoba lazo zihlutshwa yimikhaza.
Ngesikhathi sezulu kubaluhlaza kakhulu njalo imikhaza iyanda. Njengazo zonke izifuyo imbuzi zihlaselwa yimikhaza ikakhulu emsileni lasenklagwini kungakho-ke abalimi kumele bakunanzelele lokhu badibhise izifuyo zabo.
Ekhuluma lentatheli kaMthunywa uMnumzana Mthobi Ndiweni ongumlimisi eSigodini ukhuthaze abalimi ukuthi bafunde ukudibhisa imbuzi ukuze zingabulawa yimikhaza.
“Ngesikhathi sezulu imbuzi njengazo zonke ezinye izifuyo zihlaselwa yimikhaza. Kungakho sithanda ukukhuthaza abalimi ukuthi bakufake kunhlelo zabo ukuthi imbuzi kumele bazidibhise ukuze zingahlaselwa yimikhaza.
“Lokhu bengakwenza ngokulungisa esangweni lazo lapho abazathela khona idibha ukuze nxa imbuzi ziphuma zidlule zitsheba ngenyawo okuzenza imikhaza ehlasela inklagu ife.
“Kuqakathekile ukuthi zigcotshwe lasemisileni ngoba kukhona imikhaza eyingozi elakho ukubolisa umsila nxa ingathathelwanga inyathelo,” kuchaza uNdiweni
Intathelizindaba ibuye njalo yabikelwa ukuthi idibha lembuzi liqakathekile ukuze livikele imbuzi ekufeni amabele.
Kubikwa kulemikhaza ebomvu ehlasela kakhulu imbuzi amabele ethi nxa ingazange ithathelwe inyathelo imbuzi ikakhulu ezinsikazi ziyafa amabele zehluleke ukumunyisa.
UMnu Ndiweni ubuye njalo wachaza ukuthi imbuzi ezilohlupho lwemikhaza zibonakala ngokuhamba ziqhula.
Kungakho ekhuthaza abalimi ukuthi nxa bebona lokhu kumele bathathe inyathelo ngoba abanengi bajayele ukuthi bethi zihlatshwe ngameva.
Ngaphandle kwalokho abalimi bayakhuthazwa ukuthi ngezikhathi ezinje bahlale bexhumana labodokotela bezifuyo nxa kulolutho abangaluboni kuhle ezifuyweni zabo.
Online Reporter