Abalimi bakhuthazwa ukulima ingqoloyi

“Additionally, preparations are being made to ensure adequate combine harvesters are available to clear the irrigated maize crop quickly so that we have ample time to plant wheat.”

Cornelius Luphahla loSamkelo Tshuma
INHLANGANISO yeAgritex isiqalisile ukukhuthaza lokufundisa abalimi ukulima ingqoloyi. Inhlanganiso le iqhuba izifundo lezi ezabelweni ezigoqela iBulawayo, iMatabeleland South kanye leMatabeleland North.

UMnumzana Social Shava okhangela ngezokulima kulezi izabelo ubike ukuthi ingqoloyi ilinywa ngesikhathi somqando kungakho yikho bebone kufanele ukuthi bafundise labo abafisa ukuyilima ukuze bazi ngokulinywa kwayo.

“Ingqoloyi ingalinywa ngesikhathi somqando iba lesivuno esikhulu ngoba ixhakela kakhulu okuyikho okwenza ibe lezikhwebu ezinengi.

“Ihlanyelwa ngokuhazwa noma ukuthontiselwa emzileni, futhi ivuma emhlabathini oyisidaka noma oyisigodi,” kuchaza uMnu Shava.

Uqhubeke walandisa ukuthi ingqoloyi ithatha inyanga ezine kusiya kwezinhlanu ukuthi ivuthwe ilungele ukuvunwa. Ekukhuleni kwayo ingahlaselwa ngumkhuhlane othiwa yi-rust, odala ukuthi amahlamvu ayo abe bomvana, njalo umkhuhlane lo wehlisa isivuno.

Okunye okuhlasela ingqoloyi ngumtshazo ngoba uyomisa amahlamvu acine esitsha. Lokhu kuvikelwa ngokuthelela kakhulu isilimo lesi.

Kubikwa nxa umlimi elandele izeluleko zokulima ingqoloyi engathola isivuno esingaba yi-100kg kusiya ku 120kg kuhekitha eyodwa.

Kusenjalo i-Arda eseMaphisa isithole umhlaba ongaba ngamahekitha angu-400 wokulima ingqoloyi. Lokhu kutshengisa ukusekelwa kwabalimi bengqoloyi nguHulumende.

Kubikwa uHulumende uphinde waphathisa abalimi laba ngokubapha imitshina yokuthelela lokuvuna.

Kukhangelelwe ukuthi lonyaka indawo le ibelesivuno esingaba ngamathani angu-12 000 engqoloyi.