adminMsilisi Dube
ABALIMI kunye lezakhamizi ezidabuka eKezi leMaphisa zithabe okwamagama ngemva kokuqala ukusebenza kwepulazi leArda.
Ipulazi leli kubikwa belingasasebenzi kuhle ngenxa kokusweleka kwemali yokuthenga umvundiso kunye lenhlanyelo obesekubangela ukuba abalimi balumango bebulawe yindlala.
UHulumende uvumele ukuba igalaji lakoTrek lincedise ipulazi leli ukuze lenelise ukuqhuba umsebenzi walo wokulima kuhle.
Abalimi kunye lezakhamizi ezikhulume loMthunywa ziveze ukuba baphelelwa ngumsebenzi ngemva kokuvalwa kwepulazi leli.
“Izimuli zethu besiziselela ngokusebenza epulazini leli kodwa ngenxa yokusweleka kwezimali zokuthenga umvundiso kunye lenhlanyelo kwabangela ukuba kweminye iminyaka sehluleke ukulima.
“Ngomnyaka ka-2013 kunye lo2014 kasizange silime kuhle ngoba singelanhlanyelo. Njengoba lonyaka sesizaqala ukulima silethemba lokuthi imuli zethu azisoze zibulawe yindlala njengeminyakeni edluleyo,” kuchaza uMnu Daniel Ncube.
UMnu Ncube uveze ukuba waqala ukusebenza kulelipulazi ngomnyaka ka-2005.
“Imuli yami yonke ibiphila ngokulima ngakho ngemva kokuba sesehluleke ukulima eminyakeni edluleyo bekunzima ukuba siphile njalo lomangoye ubeselala eziko, labantwana bebengasafundi ngenxa kokusweleka kwezimali zesikolo,” kuchaza uMnu Ncube.
Omunye njalo umlimi uNkosikazi Lucia Bhebhe ohlala esigabeni seSontala uthe uyakholwa ukuba udubo lwendlala seluzaphela ngoba ipulazi leli selisebenza.
“Sivame ukubulawa yindlala kulumango ngakho eminyakeni edlulileyo besisithi singalima ukudla kuthengiselwe isigaba sonke.
“Ukulima kuyinsika yesizwe ngakho kumele silime ukuze silwisane lodubo lwendlala. Izigaba zonke zeMatobo ezibalisa iMaphisa, Kezi, Natisa, Chapho, Fumugwe kunye lezinye ezitshiyeneyo zivame ukuthenga ukudla epulazini leli,” kuphetha uNkkz Bhebhe.
Online Reporter