adminMsilisi Dube
ABALIMI abavelela emhlubulweni weMatabelelend South, eGwanda kunye leMatobo sebencome uhlelo lweAgricultural Show oluqhutshwe edolobheni leGwanda ngeviki edluleyo ngoba bethole ulwazi olujulileyo ngokufuya kunye lokulima izilimo ezitshiyeneyo.
Abalimi laba bathe bathole ulwazi olunengi kungcitshi zokufuya kunye lokulima njalo bazalandela indlela abanye abalimi abafuya ngayo ukuze bathuthukise isivuno sabo.
Omunye umlimi weMatshetsheni eGwanda uNkosikazi Senzeni Mlalazi uthe iAgricultural Show ibaphathise kakhulu njalo bayakholwa ukuba bazalima kuhle njalo bazitshayele inala ngenxa yolwazi abaluthole kwabanye abalimi.
“Mina bengiyebuka impahla zabanye abalimi kanye lokuyathapha ulwazi. Kungakho ngithole ulwazi olunengi kakhulu njalo ngiyakholwa ukuthi lami sengizalima okuzwayo ngoba sengiqeqetshwe ngabanye abalimi.
“Engikunanzeleleyo yikuthi abalimi abanengi balime izilimo ezincane ezibalisa unyawuthi, amabele kunye lamazambane,” kutsho uNkkz Mlalazi.
Uqhubekele phambili wathi ufunde njalo ukuthi ingcekeza yenkukhu yenza umquba omuhle kakhulu kanye lamahlamvu ezihlahla.
“Ngifunde njalo ukuthi ngisebenzise ingcekeza yenkukhu njengomquba kunye lamahlamvu ezihlahla ukuze izilimo zami zikhule kuhle,” kulandisa uNkkz Mlalalazi.
Omunye njalo umlimi uMnumzana Edmore Ndlovu ovela eKezi uthe ufunde okunengi njalo uyakholwa ukuthi isivuno sakhe sizathuthuka kuwonalo umnyaka.
“Ukuhlangana labanye abalimi abavela kwezinye indawo kuqakatheke kakhulu ngoba uthola olunye ulwazi ongelalo.
“Sengikwazi ukuzalisa inkomo ngisebenzisa i-artificial insermination ukuze kuzalwe inkomo eziqinileyo njalo ezilakho ukumelana lokuguquka komumo womkhathi.
“Esikhathini esinengi bengifuya nje kuphela ngingelalwazi ngakho izifuyo zami bezingakhuli kuhle ngenxa yokuthi ngizinika ukudla okungaqondanga. Uhlelo lolu lusivule amehlo ngakho sesizasebenzisa ulwazi esilutholileyo ukuze sifuye ngendlela eqondileyo,” kuphetha uMnu Ndlovu.
Online Reporter