admin
YiNtatheli kaMthunywa
KULOMFUNDISI welinye ibandla leKenilworth eNyathi kuVillage 4 osekuvele ukuba ubegila imikhuba esontweni ngokusebenzisa ondofa kunye lombobobo ukuya emacansini lamalunga ebandla lakhe, uMthunywa uyakuveza lokhu lamhlanje.
Impicabadala le ivele kunyanga ephelileyo lapho uMisheck Ndlovu owaziwa ngokuthi nguNcube esigabeni lesi, ongumfundisi webandla le-The Sabbath Apostolic Way Church echazwe ubugangi bakhe ngamalunga elinye ibandla ukuthi uzenza umfundisi kanti uyimpisi embethe isikhumba semvu.
Kuzwakale ukuba umfundisi lo kwavela ukuba ugcine ondofa njalo ulomuthi omenza abelamandla okulala labesifazane bengazi, lokhu abakuthi ngumbobobo awusebenzisa ngitsho lenkonzweni ukuthi aye emacansini labazalwane.
Umfundisi lo ohlala esiqintini esingaphansi kukaSobhuku uLivion Moyo kuzwakale ukuthi ubethi engafikelwa “lidlozi” lakhe lokusebenzisa umbobobo angakhethi ukuthi uwusebenzisa ebadaleni kumbe ebantwaneni.
Intatheli ixhumane lomunye umzali olomntwana owasetshenziselwa umuthi lo nguNcube (ibizo silalo) wezwa ukuthi lanxa umfundisi lo elamandla okukhulekela abantu ugangile.
“Ngavakatshela amaZiyoni angitshela ukuba umfundisi wethu lo wake wenza ucansi lomntanami ngombobobo wakhe ekubanga lesine kumfundo yaphansi. Into engizwisa ubuhlungu yikuthi ngililunga lalelibandla njalo bekungimangalisa ukuthi kungani umntanami engasathakazeleli ukuya enkozweni kodwa-ke ubengangitsheli ukuthi kungenxa kababa lo ogangileyo,” kulandisa umzali lo.
Uqhubekele phambili echaza ukuthi mhlawumbe okwenza umfundisi wakhe angamhlukuluzi yena yikuthi uyaboniswa yikho wacina emphosa.
“Ngikhuluma nje khathesi bengilele phansi ngigula amaZiyoni angitshela ukuba umfundisi lo ulesandla ekuguleni kwami ngoba ethi mina ngihlakaniphe kakhulu. Abaphurofethi laba bahamba bayambikela ukuba lokho angiphose ngakho abuye azokukhipha ngoba angekela bazakubisela kuye. Ngakho wabuya kimi ethi uzongikhulekela ukuze abulalele ngaphakathi lokho akufakayo. Okwakhathesi umzimba usungcono.
“Abaphurofethi laba babuya babika ukuba uNcube ukukhuleka uyakhuleka sibili kodwa ngezinye izikhathi ufikelwa ngumona lokuhawukela abafazi babantu acine esesebenzisa umuthi wakhe lo ukulala labomama bengazi kumbe athumele undofa wakhe ehambe elala labantu esigabeni,” kuchaza umzali lo.
Uqhubekele phambili waveza ukuthi bakhona abafakazi abambonayo umfundisi lo mhla ezokhipha lokhu ayemphose khona.
“Wafika wangikhulula isigqoko sami wangibamba eqolo, engithunga ngezandla engikhafulela abantu bekhangele ethi ungikhipha lokho angifaka khona. Konke lokhu wayekwenza abantu bekhangele wathi eqeda lapho wakhafulela emnyango wahamba,” kutsho umzali lo.
“Ngesikhathi ehlahlulwa ukuthi uyaganga wakhala inyembezi umphakathi kaVillage 4 labanye abahlala eGuwe bekhona bemthapha ngawabo amehlo,” kutsho umzali lo.
UMthunywa ubuye wakhulumisana lomunye umfakazi owayekhona uMnumzana Bongimusa Dube oveze ukuthi indaba kaNcube isegudwini esiqintini njalo abaphurofethi baveza ukuthi ugcine ondofa njalo ulombobobo.
“AmaZiyoni athi esithi uNcube abuye lezinto zakhe yena wathwala ondofa bakhe wayabagcinisa phetsheya komfula uTshangane waqeda amalanga engalugxobi kuVillage 4 kwaze kwathunyelwa abanye abaphurofethi bayabathatha khonale,” kulandisa uDube.
Uqhubekele phambili wathi amalunga ebandla leli asesesaba ukubuyela ngoba sebesazi ukuthi umfundisi wabo ugangile.
Iphephandaba likazulu likhulume lelinye ilunga lebandla leli, uNkosazana Janet Nyoni oveze ukuthi yena usezatshisa izembatho zalelibandla.
“Mina inkonzo le bengiyingena kodwa khathesi ngibeka izikhali phansi njalo izembatho zakhona ngizazitshisa ngoba akusizi ukukhonza ngapha umfundisi ekugangela ungazi.
“Ukusuka uyedinga elinye ibandla kungcono kulokuthi uNcube abe esisebenzisela umbobobo sisenkonzweni.
Sasihlala sidinga siswela ukuthi kungani nxa siphuma enkozweni siyabe singani sike salala lomuntu wesilisa sicabangela khatshana kanti ngitsho indaba ikumfundisi wethu,” kulandisa uNkszn Nyoni.
Intatheli ibuye yaxhumana lomfundisi uNcube wavuma ukuba wahamba ukuyakhulekelwa ngabaphurofethi.
“Mina ngahamba kubaphurofethi laba njengaye wonke umuntu esigabeni owayedinga ukukhulekelwa. Indaba yombobobo lokuthi ngigcina ondofa ngiyizwa ngabantu beyikhuluma, bayangiphoxa nje akulanto enjalo abangitshela yona abaphurofethi laba,” kutsho uNcube.
“Mina kwathiwa kumele ngikhulekelwe ukuba ngithole amandla amanengi njalo ngicela like lingixeke kancane endabeni lezi lingangingcolisi igama ngendaba lezo. Lokho okokuthi mina ngaphosa umuntu angikwazi,” kulandisa uMnu Ncube.
Iphephandaba likazulu libuye lakhulumisana lomuye umfakazi owale ukuqanjwa ngebizo owayekhona ngesikhathi umfundisi lo ezokhipha izinto zakhe kulowo okucatshangelwa ukuthi wamphosa waveza ukuthi kuliqiniso ukuba umfundisi lo wagangela umzalwane.
“Sabamba owangaphansi simbona efika ekhaya ezokhupha lokho akufaka omunye umzalwane. Sasimkhangele njengemuli ekwenza lokho angaze aphike thina sasikhona njalo sambona ngawethu la,” kuphetha umfakazi lo.
Online Reporter