Online Reporter
YiNtatheli kaMthunywa
Abalimi esabelweni seMatabeleland sebekhuthazwe ukuthi bangene kubhizimusi yokulima kunye lokuthengisela izilimo ze-horticulture emazweni angaphandle kwelizwe ngoba umkambo lo uyakhula futhi ubavulela amathuba amahle.
I-Horticulture luhlangothi lwezokulima eZimbabwe oluthembisayo, olulakho ukuphathisa kumali yakwamanye amazwe engena elizweni.
Eze-horticulture kuleli zigoqela ukulinywa kwezihlahla zezithelo, imbhida kunye lezinye izilimo ezikhethekileyo. Izithelo ezilinywa kakhulu zigoqela amagilebisi (grapes), ama-avocado, ama-macadamia nuts, blueberries, kunye lamahalantshisi.
Imbhida ngeminye ehamba phambili, kweze-horticulture kulinywa izilimo ezigoqela amatamatisi, ikhabitshi, imbhida, ihanyanisi kunye lamagwili. Kukanti izilimo ezifana le-peas, indumba, garlic kunye lebilebile zilinyelwa imkambo yakuleli leyakwamanye amazwe.
Ekhuluma lentatheli, owake waba nguMsekeli kamkhokheli weZimbabwe National Chamber of Commerce (ZNCC) Matabeleland Chapter njalo engusomabhizimusi, uMnumzana Louis Herbst uthe uhlangothi lwe-horticulture lubaluleke kakhulu kwezokulima elizweni ngoba kuyikho lapho okungena imali elizweni, okwenza umkhonomi uthuthuke.
“I-horticulture iyancedisa ukuthi kugxilwe ekulimeni izilimo ezehlulekeneyo ezifana lezithelo, imbhida, amaluba kwehlise ukuthembela ekulinyweni kwezilimo ezijayelekileyo ezifana lomumbu kunye legwayi.
“Ukulima izilimo ezehlukeneyo lokhu kuyancedisa ukwazi ukumelana lezimo zomkhathi kanye lokuguquka komkambo,” utsho kanje.
