Online Reporter
Nkosilathi Sibanda
INTSHA yesigabeni seBulilima, eMatabeleland South isilethuba lokufeza amaphupho ayo ngokuphiwa izifundo zamahala zemisebenzi yezandla etshiyeneyo lokwabelwa ulwazi lokuqala amabhizimusi.
Ithuba leli lethulwa yinhlanganiso yeTonganyika Trust, ehlose ukuphakamisa impilo yezakhamizi endaweni ezingaphandle kwamadolobho amakhulu ngokufundisa lokuphawula ulwazi.
Esigabeni seBulilima, iTonganyika Trust iqale ukufundisa izakhamizi esiqintini seMlomwe laseNtunungwe. Okhokhela iqula lababalisi eTonganyika Trust uMnumzana Norwel Gonese uthe balungiselela uhlelo lwabo, bebengazi ukuthi kuzakuba labantu abanengi abafuna ukufundiswa.
Uthe izifundo zabo zingaphansi kwe-National Entrepreneur Development Programme njalo zisekela uhlelo lukaHulumende elokuphakamisa abantu abakundawo ezazivalelwe phandle kudala.
“Siqalise ukufundisa esikolo seMlomwe Primary. Siqale silabafundi abangamatshumi ayisithupha lantathu. NgeSonto kubuye abantu abangamatshumi ayisikhombisa lasithupha.
“Esikolo seNtunungwe inani beliphezulu okwedlula eMlomwe, okutsho ukuba umbiko ngezifundo ezikhona ubufike ebantwini abanengi. NgoMgqibelo sibelabantu abangamatshumi ayisikhombisa lambili, ngelanga elilandelayo sihlanganise abangamatshumi ayisitshiya galombili lanye. Sikubonile ukuthi abantu bakulindawo bawomele ukufunda.
“Bafuna ukuthapha ulwazi oluzabanceda kwelakusasa. Endaweni yokuthi badinge imisebenzi, bazavula awabo amabhizimusi, kuvuswe impilo ezimulini, ilizwe lithuthuke,” kutsho uMnu Gonese.
Uthe kumisebenzi yezandla, intsha lezinye izakhamizi zikaWard 17 zifundiswe ukunusela lokulima kwakulezinsuku. Ezinye izifundo ebezikhona ngezokunakekela izigulane, ukusebenza emotsha, ukupheka lokusebenza amahoteleni.
“Lokhe siqalisile, ucingo lwethu lukhala njalonje. Abantu bafuna sibavakatshele eziqintini sibaphe ulwazi,” kutsho uMnu Gonese.
