Online Reporter
Sikumbuzo Dabengwa
“Siyaqala!”
“Siyaqala umsebenzi. Buyani lonke lizesincedisa.”
“Aye haa! Aye haa! Zhendem, zhendem!”
Luyakhala ubhulo Batayi. Luze luzwakale luhambelana lengoma ehlatshelwa yilaba bantu ababhulayo.
Lo ngomunye umumo lapho abantu besizana, bencedisana ekusebenzeni. Ingoma iyaphathisa ngokuletha ukuhambelana kanye lokutshaya ndawonye kuze kubhuleke, kuhululeke umumbu. Ingoma yona idalani kulo umsebenzi owenziwayo?
Ubungoma buphani emsebenzini onje?
Kambe ukhona ongema nxa kusetshenzwa ngale indlela? Ukuma kungakhombisa ubuvila emuntwini. Lapha umsebenzi ubalula ngoba kuyahlatshelelwa kusetshenzwa.
Imvama yikuba labo ababhulayo babelihlekana labantu abedlula ababili.
Iyatsho ingoma ukuba njengoba sebeqalile ukusebenza, abanye bonke ababuye bazobancedisa.
Abavumayo labo bavuma ngolimi lwabo olungaziwayo kodwa olulomfutho nxa lapho umuntu etshaya ubhulo ngokuhambelana lengoma. Ekuphumuleni, indima iyabe isihambe ibanga yeka!.
Ake sikhangeleni imisebenzi ebisenziwa kuhlatshelelwa. Minengi kakhulu. Lokhu bekuyindlela yokuzilibazisa kusetshenzwa.
Bekunxusa lezandla zibenengi ekusebenzeni kulandelwa ukuba amavila adalwa ekhona ekusebenzeni. Asibali mavila wodwa, sibala lamadela la athathela khatshana ekwenzeni. Aphanga atshe ekwenzeni nxa kulengoma.
Ogigayo laye ubengagiga eyedwa . Ubengazihlabelela laye eyedwa.
Bekumupha amandla ekugigeni injele yakhe yamatshakada, indlubu lokunye.
Ukulandela ingoma ethile kunikeza ubungoma ekutshayeni umgigo, kudaleke ukuphangisa ekuqedeni umsebenzi. Kubalula. Ogigayo ubengagiga ejijisana lomunye.
Lokhu kuyikugiga liphanana amathuba okugiga ngemigigo emibili, itshaywa ingoma kungadlalwa. Ingoma ibisenza amahlandla aletha umfutho ekugigeni, kusebenzeke lula.
Akesibaliseni eminye imisebenzi ebisetshenzwa iphelekezelwa yizingoma ezithile.
Yiziphi lezongoma? Usungazihlabela lawe usebenza, zifundwe langabanye.
