admin
Johas Moyo
INHLANGANISO yeLivestock Production Development esabelweni seMatabeleland North ikhuthaza abalimi ukuthi banakekele izifuyo zabo njalo bavikele ingozi zomgwaqo.
ULivestock Production Officer wesabelweni seMatabeleland North, uMnumzana Cosmas Muzunde ukhuthaze abalimi ukuthi bavikele izifuyo zabo zingatshaywa zimota emigwaqweni nanko phela inani lezifuyo ezitshaywa zimota liyanda.
“Sikhathazekile kakhulu njengenhlanganiso ngezingozi eziba khona ikakhulu ezibangelwa yizifuyo ezifana lenkomo emigwaqweni.
“Abalimi abahlala duzane lemigwaqo kumele bafake ucingo oluzavimba inkomo zabo ukuthi zingene emigwaqweni ukuze zingabangeli izingozi.
“Sinanzelela ukuthi abanye abalimi baphila ngokuthengisa izifuyo njengoba nje izulu lingananga kuhle kungakho nxa bangazivikela kabasoze baswele okokudla,” kutsho uMnu Muzunde.
Uqhubekele phambili njalo uMnu Muzunde ngokuxwayisa abalimi ukuthi balandele imithetho ekhona ngoba imithetho le iyasebenza ngazo zonke izikhathi.
“Umthetho othi abalimi okutholakala izifuyo zabo emgwaqweni kumbe ezibangela ingozi emgwaqweni kumele bahlawule uyasebenza kungakho umlimi wonke kumele abone ukuthi uyawulandela ngoba laye umphathisa ukuthi angaphelelwa yizifuyo zakhe,” kulandisa uMnu Muzunde.
Uqhubekele phambili esithi abalimi kumele bahlakaniphe ngoba bengalahlekelwa yizifuyo zabo kunye lemali yabo ngokwehluleka ukulandela imithetho ekhona
Kubikwa inhlawulo yokutholakala kwenkomo ephambanisa izimota emgwaqweni yi$10 kuthi etholakala ebusuku yona yi$20.
Uphethe ngokukhuthaza abalimi ukuthi babone ukuthi izifuyo zabo ngazo zonke izikhathi zisendaweni evikelekileyo.
Online Reporter