admin
Msilisi Dube
KULABANTWANA ababili abahlala eLusulu eBinga abagqekeze kwesinye isitolo andubana bathi lokhu bakwenza ngoba behlaselwe ngamadlozi obusela.
Abantwana laba abaleminyaka engu-12 le 16 aqalisa ukutshontsha kusukela ngenyaka kaLwezi ngomnyaka osanda kwedlula.
Ukuganga kwabo kuvele ngeviki edluleyo lapho abangene khona kwesinye isitolo ebusuku batshontsha impahla ezigoqela irayisi, amafutha, indumba kanye lokunye okutshiyeneyo.
Umtshutshisi wecala leli uMnumzana Bruce Maphosa utshele inkundla yeBinga ukuba abasolwa laba basebekwenze kwaba ngumkhuba ukuhlala betshontsha ezitolo.
Kubikwa kusukela ngomnyaka ophelileyo abasolwa laba babehlala bengena ezitolo ezitshiyeneyo betshontsha ebusuku.
Kuthe kuyonale inyanga bangena kwesinye isitolo sikamamangala uSamson Tshuma batshontsha.
Kuzwakale ukuba ngemva kokutshontsha impahla lezi abasolwa bazigcina ngakibo ukudla bazidlela. Ngelinye ilanga kubikwa bavakatshelwa nguyisekazi wathola ukudla kugcwele endlini.
Uyisekazi wababuza ukuba ukudla lokhu bakuthethe ngaphi okwabangela ukuba beqalise ukugagasa.
Kubikwa omunye umsolwa waveza ukuba ukudla lokhu bakutshontsha esitolo sikamamangala okwabangela ukuba udaba lubikwe emapholiseni.
Bebuzwa ngumantshi uMnumzana Stephen Ndlovu umsolwa omkhulu ulivumile icala lokutshontsha ukudla lokhu wathi babengenwe lidlozi lobusela.
Ngemva kokuzwa impendulo kamsolwa umantshi unqume ukuba umsolwa omdala akatswe inswazi ezine.
Online Reporter