adminKULOSANE olulenyanga ezilitshumi oluhlaselwe lwafa yisihlobo sikanina ebesicabanga ukuthi lungutikoloshi eKhayelitsha indawo eseEastern Cape kweleSouth Africa.
Unina wosane lolu, uBelekazi Sowazi (33), uthe ubekhaphe ezinye izihlobo ngoMgqibelo ntambama ngesikhathi esinye isihlobo sakhe sihlasela ingane yakhe.
“Ngithe ngingena endlini ngabona esinye isihlobo sami sidonsa obekukhanya njengemitshaqana yempahla sikujikela etshanini egumeni.
“Ngithe ngikhangelisisa ngambona ekhaba esithi ubulele utikoloshi. Ngasengisizwa umama ehlaba umkhosi lami ngagijima.
“Ngaleso sikhathi nginanzelele ukuthi bekungayisizo mpahla kodwa bekungu-Azakhanye, indodana yami.”
Uthe indoda le eyisihlobo sakhe iqinile kakhulu.
“Ufuqe umama wawela phansi. Enye indodana yami eleminyaka eyisificaminwe mibili layo ibikhala incenga lindoda ukuthi yekele ukukhaba umntanami.”
UBelekazi uthe bekulomsebenzi obusenziwa lapho ekhaya njalo abantu bebenatha utshwala umntwana lo elele endlini.
Abantu bathe sebechithekile isihlobo lesi esingaqanjwanga ngebizo kodwa ebesidakiwe sangena endlini obekulele khona umntwana.
Kubikwa uhudule umntwana eklabalala ethi: “nangu utikoloshi! Suka , suka lapha ekhaya!”
Ngemva kwalokhu kubikwa uhudule usane lolu elutshaya kabuhlungu elutshayelela phansi qede wayazihlalela endlini angathi kenzanga lutho olubi.
“Ubezihlalele nje angathi kenzanga lutho olubi.”
Unina womntwana umane wadobha usane lwakhe walugijimisela esibhedlela seLaetitia Bam Hospital kodwa ngokuswelakala kwenhlanhla usane beselwedlule emhlabeni.
“Umntwana ufike esibhedlela odokotela bahle bathi usephelile. Yiloba umntanami ekhahlelwe watshaywa kabuhlungu bekungelagazi elitshengisela ukulimala kwakhe.”
UBelekazi uthe ngeke akhohlwe kumbe axolele isihlobo sakhe ngalokhu esikwenzileyo ngoba silokhu sisithi umntwana wayengutikoloshi. Ngilapha nje ngizondile kakhulu. Ngifuna ayefela ejele,” kutsho uBelekazi.
USergeant Majola Nkohli oyisikhulumi samapholisa uthe indoda eleminyaka yokuzalwa engu-60 ibotshiwe kulandela ukubulala kwayo usane njalo izamiswa phambi komthethwandaba isetheswa umlandu wokubulala kumalanga alandelayo. —Ubulembu
Online Reporter